အောက်တိုဘာ - ၂၆ ( တနင်္လာနေ့ )
စင်ကာပူ ဝန်ကြီးချုပ် လောရင့်ဝေါင် ကတော့ ဒေသတစ်ဝန်းလုံးကို ဖုံးလွှမ်းသွားစေတဲ့ မီးခိုးမြူငွေ့ တွေအတွက် တာဝန်ရှိတဲ့ ကုမ္ပဏီတွေကို စုံစမ်းစစ်ဆေးသွားမှာဖြစ်ပြီး၊ နယ်စပ်ဖြတ်ကျော် မီးခိုးမြူငွေ့ ညစ်ညမ်းမှု တိုက်ဖျက်ရေးဥပဒေ အရ တရားစွဲဆို အရေးယူသွားမယ်လို့ ကတိပြုပြောကြား လိုက်ပါတယ်။
စင်ကာပူနိုင်ငံကို မီးခိုးမြူတွေနဲ့ ဖုံးလွှမ်းစေခဲ့တဲ့ အင်ဒိုနီးရှားနိုင်ငံဘက်က တောမီးလောင်ကျွမ်းမှုတွေနဲ့ ပတ်သက်ပြီး စင်ကာပူအစိုးရက စုံစမ်းစစ်ဆေးမှုကို တိုးချဲ့လုပ်ဆောင်နေပြီဖြစ်ပြီး၊ ဒေသတွင်း မှတ်ပုံတင်ထားတဲ့ ကုမ္ပဏီ ၁၀ ခုဆီကို အချက်အလက်တွေ တောင်းခံထားပါတယ်။
အမျိုးသား ပတ်ဝန်းကျင် အေဂျင်စီ (NEA) ရဲ့ သောကြာနေ့က ထုတ်ပြန်ချက်အရ အဆိုပါကုမ္ပဏီတွေ ပိုင်ဆိုင်တဲ့ အင်ဒိုနီးရှားနိုင်ငံက မြေယာလုပ်ပိုင်ခွင့် အချက်အလက်တွေ၊ စာရွက်စာတမ်းတွေ၊ မီးဘေးကာကွယ်ရေးနဲ့ ငြှိမ်းသတ်ရေး အစီအမံတွေအပြင် တခြားသက်ဆိုင်ရာ ကုမ္ပဏီတွေနဲ့ ဘယ်လိုဆက်စပ်မှုရှိလဲဆိုတာတွေကို တောင်းဆိုထားတဲ့ အကြောင်းကြားစာတွေကို ပေးပို့ခဲ့တယ်လို့ သိရပါတယ်။
စင်ကာပူမှာ မှတ်ပုံတင်ထားတဲ့ ကုမ္ပဏီ ၁၀ ခုစလုံးဟာ စားအုန်းဆီနဲ့ သစ်တောလုပ်ငန်းကဏ္ဍတွေမှာ ပါဝင်ကြပြီး ဝီမာနိုင်ငံတကာ ၊ ဂိုးဒင်းနိုင်ငံတကာစိုက်ပျိုးရေး နဲ့ ပထမရင်းမြစ် ကုမ္ပဏီတို့ ပါဝင်တယ်လို့ အေဂျင်စီက ဆိုပါတယ်။
စင်ကာပူ၊ မလေးရှားနဲ့ အရှေ့တောင်အာရှရဲ့ အခြားဒေသတွေမှာတော့ အင်ဒိုနီးရှားက တောမီးလောင်ကျွမ်းမှုတွေကြောင့် ထွက်ပေါ်လာတဲ့ မီးခိုးမြူတွေကြောင့် ၂၀၁၅ ခုနှစ်နောက်ပိုင်း အဆိုးရွားဆုံး လေထုညစ်ညမ်းမှုအချို့ကို ကြုံတွေ့နေရပါတယ်။ နှစ်စဉ် မီးလောင်လေ့ရှိပေမယ့် မကြာသေးမီလတွေမှာတော့ စံချိန်တင် အယ်လ်နီညို (El Niño) ရာသီဥတုကြောင့် မိုးခေါင်ရေရှားမှု ပိုဆိုးလာတာနဲ့အမျှ ဒီပြဿနာက ပိုမိုဆိုးရွားလာခဲ့ပါတယ်။
ကမ္ဘာ့အကြီးဆုံး စားအုန်းဆီ သန့်စင်သည့်ကုမ္ပဏီဖြစ်တဲ့ ဝီမာ ကတော့ NEA ရဲ့ အကြောင်းကြားစာကို "လိုက်နာဆောင်ရွက်ဖို့ လုပ်ဆောင်နေပါတယ်" လို့ ထုတ်ပြန်ချက်မှာ ပြောကြားခဲ့ပါတယ်။
ဒီဥပဒေအရ စင်ကာပူနိုင်ငံအနေနဲ့ လေထုညစ်ညမ်းမှု တစ်ရက်ချင်းစီအတွက် ကုမ္ပဏီတွေကို ဒဏ်ငွေ စင်ကာပူဒေါ်လာ ၁၀၀,၀၀၀ (အမေရိကန်ဒေါ်လာ ၇၈,၀၀၀) အထိ ဒဏ်ရိုက်အရေးယူနိုင်စွမ်း ရှိပါတယ်။ ဒါပေမဲ့လည်း မြို့ပြနိုင်ငံဖြစ်တဲ့ စင်ကာပူအနေနဲ့ ဒီဥပဒေအောက်မှာ တစ်စုံတစ်ရာ ဒဏ်ငွေရိုက်အရေးယူတာမျိုးတော့ မရှိသေးပါဘူး။
နယ်စပ်ဖြတ်ကျော် စုံစမ်းစစ်ဆေးမှုတွေမှာ ကျွမ်းကျင်ကြတဲ့ ရှေ့နေရုံးတွေ၊ စာရင်းစစ်တွေနဲ့ စုံစမ်းစစ်ဆေးရေးကုမ္ပဏီတွေ ပါဝင်တဲ့ ကျွမ်းကျင်သူများအဖွဲ့တစ်ဖွဲ့ကလည်း အစိုးရရဲ့ ကြိုးပမ်းအားထုတ်မှုတွေကို ပံ့ပိုးကူညီသွားမယ်လို့ ဥပဒေဝန်ကြီးဌာနက သောကြာနေ့မှာ ထုတ်ပြန်တဲ့ ကြေညာချက်အရ သိရပါတယ်။
REF: Yahoo
#News #Myanmar
