နှိုင်းရသီအိုရီဖြင့် ကမ္ဘာကိုကိုင်လှုပ်ခဲ့သူ ၂၀ ရာစု၏ အကြီးမြတ်ဆုံး သိပ္ပံပညာရှင်ကြီး အဲလ်ဘတ်အိုင်စတိုင်း သည် ကားမောင်းလုံးဝ မသင်ခဲ့ဖူးချေ။
ကားမောင်းရသည်မှာ အလွန်ရှုပ်ထွေးခက်ခဲလှသည်ဟု အိုင်စတိုင်းက ယူဆပြီး လမ်းလျှောက်သွားရခြင်း ကိုသာ ပိုမိုနှစ်သက်ခဲ့သည်။
၁၉၈၂ ခုနှစ် ထုတ်လွှင့်ခဲ့သော Jetsons ကာတွန်းဇာတ်လမ်းတွဲ ၊ ၁၉၆၂ ခုနှစ်က ထုတ်လွှင့်ပြသခဲ့သော သိပ္ပံဆန်းကြယ် ဇာတ်လမ်းတွဲ Blade Runner နှင့် ၁၉၈၂ ခုနှစ်က ပြသခဲ့သော Back to the Future Part II တို့တွင် မိုးပျံကားများကို အနာဂတ်၏ ယာဉ်တစ်မျိုးအဖြစ် ရိုက်ကူးပြသခဲ့ကြသည်။
သို့သော် လွန်ခဲ့သောနှစ်ပေါင်း ၈၀ ကျော်က သိပ္ပံပညာရှင်ကြီး အဲလ်ဘတ်အိုင်စတိုင်းသည် မိုးပျံကားတစ်စီး မောင်းနှင်ခဲ့ဖူးသည်။
သင်တို့ ယူဆသည့် ပုံစံမျိုးကားမဟုတ်။
မယုံနိုင်ဖွယ် အဆိုပါ ဖြစ်ရပ်မှန်ကို သင်တို့ သိလိုကြမည် ဖြစ်သည်။
၁၉၃၁ ခုနှစ်က လမ်းများပေါ်တွင် ကားများကို နေ့တိုင်းတွေ့မြင်နေရပြီ ဖြစ်သော်လည်း အများစုမှာ ကားမမောင်းတတ်ကြသေးဘဲ ကားမှာ အထူးဇိမ်ခံပစ္စည်းတစ်ခုဖြစ်နေသေးချိန် ဖြစ်သည်။
၁၉၃၀ ပြည့်လွန်ကာလများအတွင်း ကားနယ်ပယ်တွင် နည်းပညာများ လျင်မြန်စွာ ဖွံဖြိုးလာနေချိန်ဖြစ်သည်။
ကားကုမ္ပဏီတို့သည် အဆိုပါကာလအတွင်း ကားများတွင် တီထွင်မှုအသစ်များ ဖြည့်စွက်လာကြရာ Automatic transmission များ ၊ V-8, V-12, V-16 အင်ဂျင်များ ၊ heater များနှင့် ရေဒီယိုများ အပါအဝင် ဖြစ်သည်။
အဲလ်ဘတ်အိုင်စတိုင်းနှင့် ဇနီးဖြစ်သူ အယ်လ်ဆာတို့ မိုးပျံကား မောင်းနှင်ခဲ့ပုံ ရုပ်ရှင်တစ်ခု ပေါ်ပေါက်ခဲ့ဖူး ကြောင်း From the Grapevine က ဖော်ပြသည်။
(အိုင်စတိုင်း မိုးပျံကားမောင်းသည့် ရုပ်ရှင်ရိုက်ကူးခဲ့ပုံ)
အိုင်စတိုင်းနှင့် သူ၏ဇနီးသည် အသံဖမ်းစတူဒီယိုရှိ ကားပျက်ကြီးတစ်စီးပေါ်သို့ ဦးစွာတက်ခဲ့ကြသည်ကို အဆိုပါ ရုပ်ရှင်တွင် တွေ့ရသည်။
ထိုသို့လုပ်ဆောင်ရန် အိုင်စတိုင်းက ကနဦးတွင် သဘောမတူခဲ့။
ကားအတွင်း ၎င်းရှိနေပုံကို ဓာတ်ပုံအရိုက်မခံလိုသောကြောင့် ဖြစ်သည်။
သို့သော် ဂျာမန်နည်းပညာရှင်အချို့က အိုင်စတိုင်းအား စည်းရုံးနားချနိုင်ခဲ့ကြသည်။
အိုင်စတိုင်းတို့စုံတွဲ ကားပေါ်သို့ ရောက်သွားချိန်တွင် မီးအလင်းမှိန်ချလိုက်ပြီး ကားနောက်ဘက်တွင် နောက်ခံပိတ်ကားတစ်ခု ပေါ်လာသည်။
အိုင်စတိုင်းမှာ ယာဉ်မောင်းနေရာတွင်ဖြစ်ပြီး အယ်လ်ဆာမှာ ခရီးသည်ခုံတွင်ဖြစ်ကာ မိုးပျံကားဖြင့် ကောင်းကင်ခရီးသွားခဲ့ကြပုံကို ရုပ်ရှင်ပညာဖြင့် လှည့်စားရိုက်ကူးခဲ့ခြင်း ဖြစ်သည်။
ပထမဆုံးတွင် အိုင်စတိုင်းတို့သည် ဘရော့ဒ်ဝေးလမ်း ၊ ယင်းနောက် လော့စ်အိန်ဂျလိမြို့ ၊ ထိုမှတဆင့် ပင်လယ်ကမ်းခြေများသို့ ရောက်ရှိခဲ့ဟန် ပြသထားသည်။
ထို့နောက် ကားမှာ လေယာဉ်ပျံသဖွယ် ကောင်းကင်သို့ မြင့်တက်သွားဟန် တွေ့ရသည်။
အောက်ဘက်ဆီတွင် သာယာလှပသော ရော့ကီးတောင်တန်းကြီး တွေ့ရချိန်တွင် အိုင်စတိုင်းက ကားလက်ကိုင်ကို လွှတ်လိုက်သည်။
ထိုမှတဆင့် အိုင်စတိုင်းတို့ ကားပြန်လည်ဆင်းသက်ကာ ဂျာမနီတွင် လှည့်လည်သွားလာခဲ့ပုံကို ပြသထားသည်။
အဆိုပါ ရုပ်ရှင်သည် ဆယ်စုနှစ်များစွာ ပျောက်ဆုံးနေခဲ့ပြီး ၂၀၁၈ ခုနှစ်တွင်မူ နယူးယောက်မြို့ ၊ Lincoln Center တွင် အလုပ်လုပ်ကိုင်သော ကျောင်းသားတစ်ဦးက ရှာဖွေတွေ့ရှိခဲ့သည်။
ထိုအချိန်အထိ အိုင်စတိုင်း၏ ရုပ်ရှင်အကြောင်း အများပြည်သူတို့ မသိကြသေး။
Warner Brothers ရုပ်ရှင်ကုမ္ပဏီက မာစတာဖလင်ကို ဖျက်ဆီးခဲ့ပြီး အိုင်စတိုင်းတို့စုံတွဲကို ကော်ပီတစ်ခု ပေးခဲ့သည်။
((အိုင်စတိုင်း ကားမောင်းတတ်သလား))
(အိုင်စတိုင်းနှင့် သူ၏ ဇနီးကို ကားတစ်စင်းအတွင်း တွေ့ရပုံ။ ဓာတ်ပုံ-Bettmann)
သိရသမျှ အထောက်အထားအားလုံးအရ အဲလ်ဘတ်အိုင်စတိုင်းသည် ကိုယ်ပိုင်ကားတစ်စီးမရှိခဲ့သည့်နည်းတူ ကားလည်း မမောင်းတတ်ချေ။
ထို့ကြောင့်ပင် Warner Brothers ရုပ်ရှင်ကုမ္ပဏီ၏ အသံဖမ်းစတူဒီယိုအတွင်းမှ ကားပေါ်တွင် ဓာတ်ပုံအရိုက်ခံရန် ကနဦးတွင် ငြင်းဆိုခဲ့ခြင်း ဖြစ်သည်။
အိုင်စတိုင်းသည် ကားမောင်းတတ်သော ဆွေမျိုးတို့၏ အကူအညီဖြင့် သွားလာခဲ့ခြင်း ဖြစ်သည်။
အိုင်စတိုင်းအပြင် ကားမမောင်းတတ်သော နာမည်ကျော်ပုဂ္ဂိုလ်များစွာရှိရာ အမေရိကန်၏ ၂၈ ဆက်မြောက် သမ္မတ ဝုဒရိုး ဝီလ်ဆင် ၊ အမေရိကန်စာရေးဆရာကြီး Jack Kerouac ၊ အမေရိကန်ကဗျာဆရာမ အဲလစ်ဇဘက် ဘစ်ရှော့ ၊ အမေရိကန်ရုပ်ရှင်မင်းသမီး Mae West ၊ အမေရိကန် စာရေးဆရာ Ray Bradbury တို့ အပါအဝင် ဖြစ်သည်။
မိုးပျံကားများသည် ဟောလိဝုဒ်ရုပ်ရှင်များမှသည် နေ့စဉ်ဘဝသို့ အမှန်တကယ်ရောက်ရှိလာမည်လော။
အမေရိကန်တွင်မူ မိုးပျံကားများ စတင်စမ်းသပ်နေပြီဟူသော သတင်းများရှိသည်။
ကျွန်ုပ်တို့အများစုအတွက်မူ အိပ်မက်သဖွယ်သာ ရှိသေးသည်။
(CarsDB Team မှ ရေးသား ဖော်ပြသည်။)
Credit: CarsDB.com
