အရှေ့တောင်တိုင်းစစ်ဌာနချုပ် အခြေခံပညာမူလတန်း(လွန်)ကျောင်း၌ RCC နှစ်ထပ်ကျောင်းဆောင်သစ် တည်ဆောက်လျက်ရှိ

​မော်လမြိုင် နိုဝင်ဘာ ၂

 

​မွန်ပြည်နယ် မော်လမြိုင်မြို့ နောင်ခရီရပ်ကွက်ရှိ အရှေ့တောင်တိုင်းစစ်ဌာနချုပ် အခြေခံပညာ မူလတန်း (လွန်) ကျောင်း၌ ကျောင်းသား ကျောင်းသူများ အဆင်ပြေချောမွေ့စွာ ပညာသင်ကြားနိုင်ရေးအတွက် ၂၀၂၆-၂၀၂၇ ပြည်ထောင်စုခွင့်ပြုဘဏ္ဍာ ရန်ပုံငွေဖြင့် RCC နှစ်ထပ်ကျောင်းဆောင်သစ် တည်ဆောက်လျက်ရှိသည်။

 

အဆိုပါ တည်ဆောက်ရေးလုပ်ငန်းခွင်သို့ ယနေ့မွန်းလွဲပိုင်းတွင် မွန်ပြည်နယ်ဝန်ကြီးချုပ် ဦးအောင်ဝင်းသန်းသည် ပြည်နယ်ဝန်ကြီးများနှင့်အတူ သွားရောက် ကြည့်ရှုစစ်ဆေးသည်။

 

​ကြည့်ရှုစစ်ဆေးစဉ် သတ်မှတ်စံချိန်စံညွှန်းများနှင့်အညီ အရည်အသွေးပြည့်မီရေး၊ သတ်မှတ်ကာလအတွင်း အချိန်မီပြီးစီးရေးတို့နှင့်စပ်လျဉ်း၍ မှာကြားခဲ့သည်။

 

ဆက်လက်၍ မော်လမြိုင်မြို့နယ် ရိုးဂိုးကျေးရွာအုပ်စု စိုက်ပျိုးရေးဦးစီးဌာန နှစ်ရှည်ပင်များ သုတေသနနှင့် နည်းပညာဖွံ့ဖြိုးရေးဌာနတွင် စိုက်ပျိုးရေရရှိရေးနှင့် စိုက်ပျိုးရေး သုတေသနလုပ်ငန်းများ အဆင်ပြေချောမွေ့စွာ ဆောင်ရွက်နိုင်ရန်အတွက် ၂၀၂၆-၂၀၂၇ ပြည်ထောင်စုခွင့်ပြုဘဏ္ဍာရန်ပုံငွေဖြင့် ဆောင်ရွက်သည့် 30 KVA ဆိုလာစနစ် (Solar System) တပ်ဆင်ပြီးစီးမှုအခြေအနေ၊ ရိုးဂိုးကျေးရွာ အခြေခံပညာမူလတန်း (လွန်) ကျောင်း၌ ၂၀၂၆- ၂၀၂၇ ပြည်ထောင်စုခွင့်ပြုဘဏ္ဍာ ရန်ပုံငွေဖြင့် RCC နှစ်ထပ်ကျောင်းဆောင်သစ် ဆောက်လုပ်နေမှုကို ကြည့်ရှုစစ်ဆေးပြီး လိုအပ်သည်များ မှာကြားခဲ့ကြောင်း သိရသည်။

စည်သူ(ပြန်/ဆက်)