(၃၈)နှစ်မြောက် အထွေထွေအုပ်ချုပ်ရေးဦးစီးဌာန နှစ်ပတ်လည်နေ့အထိမ်းအမှတ်အဖြစ် အမျိုးသား(ဖူဆယ်) ဘောလုံး ပြိုင်ပွဲနှင့် ဆုပေးပွဲ ကျင်းပ

ပုသိမ်     နိုဝင်ဘာ    ၂

ဧရာဝတီတိုင်းဒေသကြီး ပုသိမ်မြို့ ကိုးသိန်းဖူဆယ်အားကစားရုံတွင် ယနေ့နံနက်ပိုင်းက (၃၈)နှစ်မြောက် အထွေထွေအုပ်ချုပ်ရေးဦးစီးဌာန နှစ်ပတ်လည်နေ့အထိမ်းအမှတ်အဖြစ် အမျိုးသား(ဖူဆယ်)ဘောလုံးပြိုင်ပွဲ ဗိုလ်လုပွဲနှင့် ဆုပေးပွဲအခမ်းအနားကို ကျင်းပရာ အခမ်းအနားသို့ ပုသိမ်ခရိုင် အထွေထွေအုပ်ချုပ်ရေးဦးစီးဌာန ခရိုင်အုပ်ချုပ်ရေးမှူး၊   မြို့နယ်အုပ်ချုပ်ရေးမှူးများ၊ ဌာနဆိုင်ရာဝန်ထမ်းများနှင့် ပြိုင်ပွဲဝင်အသင်းများ တက်ရောက်ကြသည်။

ဦးစွာ   အမျိုးသား(ဖူဆယ်)ဘောလုံးပြိုင်ပွဲ ဗိုလ်လုပွဲအဖြစ် အထွေထွေအုပ်ချုပ်ရေးဦးစီးဌာန ဧရာဝတီတိုင်းဒေသကြီး  အသင်းနှင့် ပုသိမ်မြို့နယ်အသင်းတို့ ယှဉ်ပြိုင်ခဲ့ကြပြီး  ပုသိမ်မြို့နယ်အသင်းမှ ခြောက်ဂိုး - ဂိုးမရှိဖြင့် အနိုင်ရရှိခဲ့သည်။   ထို့နောက် ဆုပေးပွဲအခမ်းအနားကို ဆက်လက်ကျင်းပရာ ပုသိမ်ခရိုင်အထွေထွေအုပ်ချုပ်ရေးဦးစီးဌာန ခရိုင်အုပ်ချုပ်ရေးမှူး ဦးရည်မွန်က အမျိုးသား(ဖူဆယ်) ဘောလုံးပြိုင်ပွဲတွင် ပထမဆုရရှိသော ပုသိမ်မြို့နယ်အသင်းအား ဂုဏ်ပြုဆုနှင့် ဆုဖလားကိုလည်းကောင်း၊ ဒုတိယဆုရရှိသော ဧရာဝတီတိုင်းဒေသကြီးအသင်း၊  နှစ်သိမ့်ဆုရရှိသော  သာပေါင်းမြို့နယ်အသင်းနှင့် ပုသိမ်ခရိုင်အသင်းတို့အား ဂုဏ်ပြုဆုများကိုလည်းကောင်း  ချီးမြှင့်ခဲ့သည်။

ကျော်ဟိန်း(ပြန်/ဆက်)