ပေါင်မြို့နယ်၌ မွန်လုပ်ငန်းရှင်များအသင်း(MEA)၏ စီးပွားရေးအခွင့်အလမ်းစကားဝိုင်းနှင့် မြို့နယ်အမှုဆောင်အဖွဲ့ရွေးချယ်ပွဲ ပြုလုပ်

ပေါင်   နိုဝင်ဘာ   ၃

 

မွန်ပြည်နယ် ပေါင်မြို့နယ်၌ မွန်လုပ်ငန်းရှင်များအသင်း (MEA) ၏ စီးပွားရေး အခွင့်အလမ်းစကားဝိုင်းနှင့် မြို့နယ်အမှုဆောင်အဖွဲ့ ရွေးချယ်ပွဲကို ယမန်နေ့နံနက်ပိုင်းက အထက(ပေါင်) ရွှေရတုခန်းမ၌ ပြုလုပ်သည်။

 

ဦးစွာ MEA နာယက ဦးအောင်သိန်းက အမှာစကားပြောကြား သည်။ ထို့နောက် အမှုဆောင်အဖွဲ့ဝင် နိုင်ဗညားအောင်က မွန်လုပ်ငန်းရှင် များအသင်း(MEA)ကို ၂၀၁၈ ခုနှစ် ဇူလိုင် ၇ ရက်တွင် မော်လမြိုင်မြို့ ရာမညဟိုတယ်၌ စတင်ဖွဲ့စည်းခဲ့သည့် နောက်ခံသမိုင်း၊ MEA ၏ ရည်ရွယ်ချက်၊ ပြည်တွင်း/ပြည်ပ ခရီးစဉ်များနှင့် ရရှိခဲ့သည့် အောင်မြင်မှုများ၊ ရှေ့လုပ်ငန်းစဉ်များနှင့် အသင်းဝင် သတ်မှတ်ချက်များကို ရှင်းလင်း ပြောကြားသည်။

 

ဆက်လက်၍ စီးပွားရေးစကားဝိုင်းကို ကျင်းပရာ အမှုဆောင် အဖွဲ့ဝင်များဖြစ်ကြသည့် ဦးကျော်စိန်ဝင်း၊ နိုင်သိန်းဇော်၊ မိဆွေဇာသူနှင့် ဦးမင်းအောင်မြင့်တို့က ပေါင်မြို့နယ်အတွင်းရှိ စီးပွားရေးလုပ်ငန်းဆိုင်ရာ အခွင့်အလမ်းများနှင့်ပတ်သက်၍ အပြန်အလှန် ဆွေးနွေးပြောကြားသည်။

 

ထို့နောက် ပေါင်မြို့နယ်အဆင့် မွန်လုပ်ငန်းရှင်များအသင်း (MEA) အမှုဆောင်အဖွဲ့ကို အဖွဲ့ဝင် ၁၅ ဦးတို့ဖြင့် စနစ်တကျ ပြန်လည်ဖွဲ့စည်းခဲ့ပြီး မြို့နယ်အသင်းဥက္ကဋ္ဌ ဦးသက်ထွန်းက ကျေးဇူးတင်စကား ပြောကြားခဲ့ကြောင်း သိရသည်။

 

မွန်မလေး(ပြန်/ဆက်)