
Pika (NP News) - နိုဝင်ဘာ ၁၆
မြောက်ကိုရီးယားအစိုးရ ကျောထောက်နောက်ခံပြုထားတဲ့ ဟက်ကာတွေက အခြားလူတွေရဲ့အထောက်အထားတွေကို ခိုးယူတာတွေနဲ့ AI နည်းပညာသုံး အတုအယောင် ဗီဒီယိုခေါ်ဆိုမှုလုပ်ခြင်းတို့ပါဝင်တဲ့ လိမ်လည်မှုနည်းလမ်းတွေကို အသုံးပြုပြီးတော့ အမေရိကန်ဒေါ်လာသန်း(၄၀၀)ကျော်ကို ခိုးယူသွားခဲ့တယ်လို့ အက်ဖ်ဘီအိုင်အဖွဲ့က ပြောကြားခဲ့ပါတယ်။
အခုလအတွင်းမှာပဲ မြောက်ကိုရီးယားနဲ့ဆက်နွယ်နေတဲ့ဟက်ကာတွေက ဒစ်ဂျစ်တယ်ငွေကြေးပလက်ဖောင်းတစ်ခုဖြစ်တဲ့ Binance ကနေ အမေရိကန်ဒေါ်လာ(၆)ဘီလျံကျော်ကို ခိုးယူခဲ့တယ်လို့ အက်ဖ်ဘီအိုင်အဖွဲ့က စွပ်စွဲပြောဆိုထားပေမယ့်လည်း မြောက်ကိုရီးယားအစိုးရဘက်ကတော့ အဲဒီစွပ်စွဲပြောဆိုချက်တွေကို ငြင်းဆန်ပယ်ချထားတယ်လို့ သိရပါတယ်။
အက်ဖ်ဘီအိုင်ရဲ့ဆိုက်ဘာဌာနလုပ်ငန်းလည်ပတ်မှုဆိုင်ရာဒါရိုက်တာ ဘရတ်လယ်သာမန်းက "မြောက်ကိုရီးယားအစိုးရဟာ ၎င်းတို့ရဲ့တရားမဝင် လက်နက်ထုတ်လုပ်ရေးအစီအစဉ်တွေအတွက် ငွေကြေးထောက်ပံ့ဖို့ ဒစ်ဂျစ်တယ်ငွေကြေးတွေကို ကြီးမားတဲ့ပမာဏခိုးယူရရှိတဲ့ ဝင်ငွေတွေအပေါ်ကို မှီခိုအားထားနေရပါတယ်။ မကြာသေးခင်နှစ်တွေအတွင်းမှာလည်း သူတို့က ဒေါ်လာဘီလျံနဲ့ချီပြီး ခိုးယူမှုတွေကို လုပ်ဆောင်ခဲ့ကြပါတယ်” လို့ ပြောခဲ့ပါတယ်။
ဒါ့ပြင် Binance ပလက်ဖောင်းကို ဆိုက်ဘာတိုက်ခိုက်ခဲ့တဲ့ဖြစ်စဉ်အပြင် မြောက်ကိုရီးယားဟက်ကာတွေက ဆိုရှယ်မီဒီယာပေါ်မှာ လိမ်လည်တဲ့နည်းလမ်းတွေကိုသုံးပြီး ဒစ်ဂျစ်တယ်ငွေကြေးနဲ့ ငွေကြေးဝန်ဆောင်မှုပိုင်းက လူပုဂ္ဂိုလ်တွေကို ပစ်မှတ်ထားပြီး ဆိုက်ဘာတိုက်ခိုက်မှုတွေကို လုပ်ဆောင်လျက်ရှိတယ်လို့ အက်ဖ်ဘီအိုင်အဖွဲ့ကပြောကြားခဲ့ပါတယ်။
အမေရိကန်ဥပဒေစိုးမိုးရေးအေဂျင်စီက “FaceStealer” လို့ အမည်ပေးထားတဲ့ ဒီလှည့်စားမှုပုံစံကြောင့် ပြီးခဲ့တဲ့အချိန်(၁၈)လအတွင်း အမေရိကန်ဒေါ်လာသန်း(၄၀၀)ကျော်ခိုးယူခံခဲ့ရတယ်လို့ သိရပါတယ်။
FaceStealer ဟက်ကာတွေဟာ သူတို့ပစ်မှတ်ထားတဲ့လူနဲ့ ရင်းနှီးကျွမ်းဝင်တဲ့လူတစ်ဦးလိုမျိုး ဟန်ဆောင်ပြီးတော့ ယုံကြည်မှုရရှိစေဖို့ AI နည်းပညာသုံးအတုအယောင်ဗီဒီယိုတွေကို အသုံးပြုပြီးတော့ ငွေကြေးလိမ်လည်ခိုးယူမှုတွေကို လုပ်ဆောင်တာဖြစ်တယ်လို့ အက်ဖ်ဘီအိုင်အဖွဲ့က ပြောကြားခဲ့ပါတယ်။