Eleven Media Group

■ ပြည်ပအကူအညီမပါဘဲ ငါးနှစ်တာအတွင်းပြည်ပကြွေးမြီ သုံးဘီလျံကျော်( ၂၉ ရာခိုင်နှုန်းခန့်) လျှော့ချနိုင်ခဲ့ကြောင်း နိုင်ငံတော်သမ္မတ မိန့်ခွန်းတွင် ပြောကြား

ပြည်ပအကူအညီမပါဘဲ ငါးနှစ်တာအတွင်းပြည်ပကြွေးမြီ သုံးဘီလျံကျော်( ၂၉ ရာခိုင်နှုန်းခန့်) လျှော့ချနိုင်ခဲ့ကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။

နိုဝင်ဘာ ၁၈ ရက်က ကျင်းပသည့် ပြည်ထောင်စုလွှတ်တော် တတိယပုံမှန်အစည်းအဝေးတွင် နိုင်ငံတော်၏ မူဝါဒများနှင့် ရှေ့ဆက်ဆောင်ရွက်မည့် လုပ်ငန်းစဉ်များနှင့်ပတ်သက်၍ နိုင်ငံတော်သမ္မတက မိန့်ခွန်းပြောကြားစဥ် ထည့်သွင်းပြောကြားခဲ့ခြင်းဖြစ်သည်။

" ကျွန်တော် တာဝန်ယူတဲ့အချိန်မှာ ကြွေးမြီတွေ ရအောင်ပြန်ဆပ်ပါတယ်။ တဖြည်းဖြည်းနဲ့ ပြန်ဆပ်တာမှာ ၂၀၂၅-၂၀၂၆ အစိုးရ တာဝန်ယူတဲ့အချိန်မှာ ၈ ဒသမ ၆၉ ဘီလီယံ အထိလျှော့ချနိုင်တယ်။ အကြွေးတွေ ပြန်ဆပ်ပေမယ့် ပြည်ပကထောက်ပံ့မှုတွေ ချေးငွေတွေ မရပါဘူး။ ကမ္ဘာ့ဘဏ်တို့ ADB တို့ တဦးချင်းပေးတာတွေ မရပါဘူး" ဟု နိုင်ငံတော်သမ္မတက ပြောကြားသည်။

ဒီမိုကရေစီအစိုးရ ပထမသက်တမ်း ၂၀၁၁ – ၂၀၁၂ ဘဏ္ဍာနှစ်က ပြည်ပကြွေးမြီ ဒေါ်လာ ၇၉၁၈ ဒသမ ၄၈၃ ဘီလျံ၊ ၂၀၁၂ – ၂၀၁၃ ဘဏ္ဍာနှစ်တွင် ပြည်ပကြွေးမြီ ဒေါ်လာ ၈၁၁၂ ဒသမ ၇၂၂ ဘီလျံ၊ ၂၀၁၃ – ၂၀၁၄ ဘဏ္ဍာနှစ်တွင် ပြည်ပကြွေးမြီ ဒေါ်လာ ၉၇၅၆ ဒသမ ၅၈၃ ဘီလျံ၊ ၂၀၁၄ – ၂၀၁၅ ဘဏ္ဍာနှစ်တွင် ပြည်ပကြွေးမြီ ဒေါ်လာ ၈၈၃၈ ဒသမ ၁၃၇ ဘီလျံနှင့် ၂၀၁၅ – ၂၀၁၆ ဘဏ္ဍာနှစ်တွင် ပြည်ပကြွေးမြီ ဒေါ်လာ ၉၅၃၀ ဒသမ ၂၅၂ ဘီလျံရှိခဲ့ကြောင်း သိရသည်။

ဒီမိုကရေစီအစိုးရ ဒုတိယသက်တမ်း ၂၀၁၆ – ၂၀၁၇ ဘဏ္ဍာနှစ်က ပြည်ပကြွေးမြီ ဒေါ်လာ ၉၁၄၈ ဒသမ ၈၂၁ ဘီလျံ၊ ၂၀၁၇ – ၂၀၁၈ ဘဏ္ဍာနှစ်တွင် ပြည်ပကြွေးမြီ ဒေါ်လာ ၁၀၂၀၀ ဒသမ ၁၇၀ ဘီလျံ၊ ၂၀၁၈ ခြောက်လတာဘတ်ဂျက်တွင် ပြည်ပကြွေးမြီဒေါ်လာ ၉၇၅၂ ဒသမ ၄၇၄ ဘီလျံ၊ ၂၀၁၈ – ၂၀၁၉ ဘဏ္ဍာနှစ်တွင် ပြည်ပကြွေးမြီ ဒေါ်လာ ၁၀၀၀၃ ဒသမ ၈၇၂ ဘီလျံ၊ ၂၀၁၉ – ၂၀၂၀ ဘဏ္ဍာနှစ်တွင် ပြည်ပကြွေးမြီ ဒေါ်လာ ၁၁၃၅၉ ဒသမ ၉၇၁ ဘီလျံနှင့် ၂၀၂၀ – ၂၀၂၁ ဘဏ္ဍာနှစ်တွင် ပြည်ပကြွေးမြီ ဒေါ်လာ ၁၂၀၈၃ ဒသမ ၈၀၀ ဘီလျံရှိခဲ့ကြောင်း သိရသည်။

နိုင်ငံတော်စီမံအုပ်ချုပ်ရေးကောင်စီ စတင်တာဝန်ယူခဲ့ကာလတွင် ပြည်ပချေးငွေများကို နှစ်စဥ် ပြန်လည်ပေးဆပ်ခဲ့သဖြင့် ၂၀၂၁ – ၂၀၂၂ ဘဏ္ဍာနှစ်တွင် ပြည်ပကြွေးမြီ ဒေါ်လာ ၁၁၄၂၉ ဒသမ ၁၄၆ ဘီလျံ၊ ၂၀၂၂ – ၂၀၂၃ ဘဏ္ဍာနှစ်တွင် ပြည်ပကြွေးမြီ ဒေါ်လာ ၁၀၅၉၅ ဒသမ ၆၆၇ ဘီလျံ ၂၀၂၃ – ၂၀၂၄ ဘဏ္ဍာနှစ်တွင် ပြည်ပကြွေးမြီ ဒေါ်လာ ၉၆၈၆ ဒသမ ၆၄၆ ဘီလျံ၊ ၂၀၂၄ – ၂၀၂၅ ဘဏ္ဍာနှစ်တွင် ပြည်ပကြွေးမြီ ဒေါ်လာ ၉၃၁၉ ဒသမ ၁၆၈ ဘီလျံ၊ ၂၀၂၅ – ၂၀၂၆ ဘဏ္ဍာနှစ်တွင် ပြည်ပကြွေးမြီ ဒေါ်လာ ၈၆၉၆ ဒသမ ၄၅၉ ဘီလျံသို့ လျော့ကျခဲ့ကြောင်း သိရသည်။

လက်ရှိအစိုးရလက်ထက် ၂၀၂၆ – ၂၀၂၇ ဘဏ္ဍာနှစ်တွင်လည်း ပြည်ပကြွေးမြီများ ထပ်မံပေးဆပ်မည်ဖြစ်ရာ စုစုပေါင်းပြည်ပကြွေးမြီအား ယခုဘဏ္ဍာနှစ်ကုန်တွင် ဒေါ်လာ ၈၅၆၉ ဒသမ ၀၄၁ ဘီလျံအထိ လျော့ကျလာရန် မျှော်မှန်းထားကြောင်း နိုင်ငံတော်သမ္မတက ပြည်ထောင်စုလွှတ်တော်တွင် ပြောကြားချက်အရ သိရသည်။

ထို့ပြင် ဘဏ္ဍာရေးလိုငွေမှာ ၂၀၁၁ ခုနှစ်မှ ၂၀၁၆ ပထမအစိုးရသက်တမ်းတွင် ဒေါ်လာ ၁၂ ဒသမ ၁ ဘီလျံခန့် ရှိခဲ့ပြီး ၂၀၁၆-၂၀၂၁ ဘဏ္ဍာနှစ်တွင် ဒေါ်လာ ၁၂ ဒသမ ၆ ဘီလျံခန့် ထပ်မံလိုငွေပြခဲ့သဖြင့် အစိုးရနှစ်ဆက်တွင် စုစုပေါင်း ဘဏ္ဍာရေးလိုငွေ အမေရိကန်ဒေါ်လာ ၂၄ ဒသမ ၇ ဘီလျံခန့် ရှိခဲ့သည်ဟု နိုင်ငံတော်သမ္မတက ပြောကြားသည်။
ယင်းသို့ ဖြစ်ရခြင်းမှာ ပို့ကုန်နှင့် သွင်းကုန် မညီမျှမှုကြောင့်ဖြစ်ကြောင်း သမ္မတက ပြောကြားသည်။

" အစီရင်ခံစာရေးခိုင်းပါတယ်။ ကျွန်တော်တို့လည်း နဂိုကတည်းက ဒီလိုဖြစ်တယ်ဆိုတာကို သိပါတယ်။ သို့သော် ကိန်းဂဏန်းတိတိကျကျသိချင်တဲ့အတွက် ကြောင့် အစီရင်ခံစာရေးပြီး ၂၀၂၂ ခုနှစ်မှာ ဒီအစီရင်ခံစာကို တင်ခဲ့ခိုင်းပါတယ်။ တင်ခဲ့ခိုင်းတော့ အဲဒီမှာ ခေတ်အဆက်ဆက်ပို့ကုန်နဲ့ သွင်းကုန် မညီမျှ မှုတွေ အများကြီးတွေ့ပါတယ်" ဟု နိုင်ငံတော် သမ္မတက ပြောကြားသည်။

မူရင်းသတင်း — Eleven Media Group