
နိုင်ငံတကာရာဇဝတ်တရားရုံး (ICC) သည် အထိန်းအကွပ်မဲ့နေပြီဖြစ်ကြောင်း အမေရိကန်သမ္မတ ဒေါ်နယ်ထရန့်က နိုဝင်ဘာ ၂၀ ရက်တွင် ပြောကြားခဲ့သည်။
အမေရိကန်၊ ရုရှားနှင့် တရုတ်တို့က ICC ကို ပြင်းထန်စွာဝေဖန်နေချိန်တွင် ထရန့်၏ ပြောကြားချက် ထွက်ပေါ်လာခြင်းဖြစ်သည်။
တရုတ်နိုင်ငံ ရှန်ကျန်းမြို့တွင် တရုတ်သမ္မတ ရှီကျင်းပင်၊ ရုရှားသမ္မတ ဗလာဒီမာပူတင်တို့နှင့် ပြုလုပ်ခဲ့သည့် ထိပ်သီးအစည်းအဝေးမှ အပြန်တွင် သမ္မတ ထရန့်က “နိုင်ငံတကာရာဇဝတ်တရားရုံးရဲ့ အလွဲသုံးစားလုပ်မှုတွေနဲ့ လုပ်ပိုင်ခွင့် ကျော်လွန်ဆောင်ရွက်မှုတွေကို ရှုတ်ချဖို့ တရုတ်နိုင်ငံက ပထမဆုံးအကြိမ် သဘောတူညီခဲ့ပါတယ်” ဟု ပြောဆိုခဲ့သည်။
“သူတို့ (ICC) အနေနဲ့ နိုင်ငံ့အကြီးအကဲတွေကို ဝင်ရောက်ဖမ်းဆီးလို့ ရတယ်လို့ ယူဆနေကြပေမဲ့ အဲဒီလို လုပ်လို့မရပါဘူး။ သူတို့က အကြောင်းပြချက်မရှိဘဲ ဒီလိုလုပ်နိုင်နေတဲ့အတွက် ကျွန်တော်တို့ အစုအဖွဲ့အနေနဲ့ အဲဒါကို ရှုတ်ချခဲ့ကြတာပါ” ဟု ထရန့်က ပြောကြားခဲ့သည်။
ပြီးခဲ့သည့်လအတွင်းက အမေရိကန်သည် ICC ကို ပိတ်ဆို့အရေးယူမှုအသစ်များ ချမှတ်ခဲ့ပြီး အဆိုပါတရားရုံးကို ဖြိုဖျက်ပစ်မည်ဟု အမေရိကန်အစိုးရက ကြွေးကြော်ထားသည်။
အစ္စရေးဝန်ကြီးချုပ် ဘင်ဂျမင် နေတန်ယာဟုကို ဂါဇာဒေသအတွင်း ကျူးလွန်ခဲ့သည်ဟု စွပ်စွဲခံထားရသည့် ရာဇဝတ်မှုများနှင့်ပတ်သက်ပြီး ဖမ်းဝရမ်းထုတ်ရန် တရားရုံး၏ လုပ်ဆောင်ချက်ကို ထရန့်က ဒေါသထွက်နေသည်။
ICC သည် အဆိုးရွားဆုံး ရက်စက်ကြမ်းကြုတ်မှုများဖြင့် စွပ်စွဲခံရသူများကို တရားစွဲဆိုစစ်ဆေးသည့် အဖွဲ့အစည်းဖြစ်ပြီး တာဝန်ခံမှုရှိစေရန် လုံလောက်သော တရားစီရင်ရေးစနစ်မရှိသည့် နိုင်ငံများအတွက် နောက်ဆုံးအားကိုးရာ တရားရုံးအဖြစ် ဆောင်ရွက်လျက်ရှိသည်။
အမေရိကန်သည် ICC ကို တည်ထောင်သည့် Rome Statute တွင် လက်မှတ်ရေးထိုးခဲ့သော်လည်း အတည်ပြုပြဋ္ဌာန်းခြင်းမရှိခဲ့ပေ။ ထို့အတူ အစ္စရေး၊ ရုရှားနှင့် တရုတ်နိုင်ငံတို့သည်လည်း ICC အဖွဲ့ဝင်နိုင်ငံများ မဟုတ်ကြပေ။
Ref: AFP