Eleven Media Group

ONE Friday Fights 101 ပြိုင်ပွဲတွင် အဲမွီနှင့် သွေးလင်းထက်တို့၏ တွဲဆိုင်းများ ပါဝင်

Photo: ONE

မတ် (၂၁) ရက်တွင် ထိုင်းနိုင်ငံ၌ ကျင်းပမည့် ONE Friday Fights 101 ပြိုင်ပွဲတွင် မြန်မာဖိုက်တာနှစ်ဦးဖြစ်သည့် အဲမွီနှင့် သွေးလင်းထက်တို့၏ တွဲဆိုင်းများ ပါဝင်လာကြောင်း သိရသည်။
ယင်းပြိုင်ပွဲတွင် တွဲဆိုင်းစုစုပေါင်း (၁၂)ပွဲ ပါဝင်မည်ဖြစ်ပြီး အဲမွီတွဲဆိုင်းကို ပွဲစဉ် (၆)၊ သွေးလင်းထက်တွဲဆိုင်းကို ပွဲစဉ် (၇)တွင် ကျင်းပမည်ဖြစ်သည်။
အဲမွီသည် အစ္စရေးနိုင်ငံသား အာဟာဗက်ဒ်နှင့် ယှဉ်ပြိုင်ထိုးသတ်ရမည်ဖြစ်ပြီး ONE နှင့် (၄)ပွဲမြောက် ထိုးသတ်ရမည်ဖြစ်သည်။
အဲမွီသည် ပြီးခဲ့သည့် (၃)ပွဲတွင် နှစ်ပွဲနိုင်၊ တစ်ပွဲရှုံးနိမ့်ထားပြီး အနိုင်ရထားသည့် နှစ်ပွဲစလုံး အလဲထိုးထားခြင်းဖြစ်ကာ ရှုံးနိမ့်သည့်ပွဲမှာမူ အမှတ်ဖြင့်အရေးနိမ့်ခဲ့ခြင်းဖြစ်သည်။
အဲမွီပြိုင်ဘက် အာဟာဗက်ဒ်သည် ONE နှင့် ပထမဆုံးပွဲထိုးသတ်ခြင်းဖြစ်သော်လည်း မွေထိုင်းပွဲ အတွေ့အကြုံရှိသူဖြစ်ပြီး (၇) ပွဲထိုးသတ်ရာတွင် (၇) ပွဲစလုံး အနိုင်ရထားသလို (၅) ပွဲကို အလဲထိုးဖြင့်အနိုင်ရထားခြင်းဖြစ်သည်။
သွေးလင်းထက်သည် ထိုင်းဖိုက်တာ ဝမ်တာဝီနှင့် ယှဉ်ပြိုင်ထိုးသတ်ရမည်ဖြစ်ပြီး ယခုနှစ်အတွင်း ဒုတိယမြောက် ထိုးသတ်ရမည့်ပွဲဖြစ်သည်။
သွေးလင်းထက်သည် ရက်ပေါင်း(၃၀) ကျော်အကြာမှာပင် နောက်ထပ်တစ်ပွဲ ထိုးသတ်ရခြင်းဖြစ်ပြီး ONE နှင့် (၄) ပွဲမြောက် ထိုးသတ်ခွင့်ရခြင်းဖြစ်ကြောင်း သိရသည်။
သွေးလင်းထက်သည် ပြီးခဲ့သည့် (၃) ပွဲတွင် နှစ်ပွဲနိုင်၊ တစ်ပွဲရှုံးနိမ့်ထားပြီး နောက်ဆုံးထိုးသတ်သည့်ပွဲတွင် ထိုင်းဖိုက်တာကို ပထမအချီမှာပင် အလဲထိုးအနိုင် ရထားခြင်းဖြစ်သည်။
ဝမ်တာဝီသည် ONE နှင့် ဒုတိယမြောက်ပွဲ ထိုးသတ်ခွင့်ရခြင်းဖြစ်ပြီး ပထမပွဲတွင် အနိုင်ရထားသည်။

မူရင်းသတင်း — Eleven Media Group