Eleven Media Group

■ အာဆီယံ ယူ-၁၉ အမျိုးသမီးပြိုင်ပွဲ ထိုင်း-မြန်မာ ဆီမီးပွဲကို ပထမပွဲကျင်းပမယ်

Photo: MFF

ဗီယက်နမ်နိုင်ငံမှာ ကျင်းပနေတဲ့ ၂၀၂၅ အာဆီယံ ယူ-၁၉ အမျိုးသမီးချန်ပီယံရှစ်ပြိုင်ပွဲ ဆီမီးဖိုင်နယ်ပွဲစဉ်တွေကို ဇွန် ၁၆ ရက်မှာ ကျင်းပမှာဖြစ်ပြီး မြန်မာ ယူ-၁၉ အမျိုးသမီးအသင်းဟာ ပထမပွဲ ကစားရမှာဖြစ်ပါတယ်။

အိမ်ရှင်ဗီယက်နမ်အသင်းဟာ ဒုတိယပွဲကစားမှာဖြစ်တာကြောင့် ထိုင်းအသင်းနဲ့ မြန်မာအသင်းပွဲကို ပထမပွဲကျင်းပမှာဖြစ်ပါတယ်။

ဆီမီးဖိုင်နယ်ပွဲအဖြစ် ထိုင်းအသင်းနဲ့ မြန်မာအသင်းပွဲကို မြန်မာစံတော်ချိန် မွန်းလွဲ ၂ နာရီခွဲ၊ ဗီယက်နမ်အသင်းနဲ့ အင်ဒိုနီးရှားအသင်းပွဲကို မြန်မာစံတော်ချိန် ညနေ ၆ နာရီမှာ ကျင်းပမှာဖြစ်ပါတယ်။

မြန်မာအသင်းဟာ အုပ်စုဒုတိယသာရတာကြောင့် ဆီမီးဖိုင်နယ်မှာ လက်ရှိချန်ပီယံ ထိုင်းအသင်းနဲ့ ကစားရတာဖြစ်ပါတယ်။

မြန်မာအသင်းဟာ အုပ်စုပွဲတွေမှာ ဗီယက်နမ်အသင်းကို (၂-ဝ) ဂိုးနဲ့ အရေးနိမ့်ခဲ့ပေမယ့် လာအိုအသင်းကို (၆-ဝ) ဂိုး၊ တီမောအသင်းကို (၇-ဝ) ဂိုးနဲ့ အနိုင်ရခဲ့တာဖြစ်ပါတယ်။

အုပ်စုပွဲတွေအပြီး အုပ်စု (A) မှာ ဗီယက်နမ်အသင်းက ကိုးမှတ်နဲ့ အုပ်စုပထမ၊ မြန်မာအသင်းက ခြောက်မှတ်နဲ့ အုပ်စုဒုတိယ၊ အုပ်စု (B) မှာ ထိုင်းအသင်းက ကိုးမှတ်နဲ့ အုပ်စုပထမ၊ အင်ဒိုနီးရှားအသင်းက လေးမှတ်နဲ့ အုပ်စုဒုတိယရပြီး ဆီမီးဖိုင်နယ် တက်ရောက်ခဲ့တာပါ။

မြန်မာအသင်းဟာ တတိယအကြိမ် ဆီမီးဖိုင်နယ် တက်ရောက်နိုင်ခဲ့တာဖြစ်ပြီး ပထမဆုံးပြုလုပ်တဲ့ပြိုင်ပွဲက ပတ်လည်စနစ်နဲ့ ကျင်းပခဲ့တာဖြစ်ပါတယ်။

မူရင်းသတင်း — Eleven Media Group