ဖီဖာကလပ်ကမ္ဘာ့ဖလားပြိုင်ပွဲ အုပ်စုအဖွင့်ပွဲစဉ်မှာ ပြိုင်ဘက် မော်ရိုကိုကလပ် ဝီဒက်ကာဆာဘလန်ကာအသင်းကစားသမား ဆမ်မြူရယ်အိုဘန်းရဲ့မျက်နှာကို ခြေထောက်နဲ့ကန်မိခဲ့တဲ့ မန်စီးတီးနောက်ခံလူ ရီကိုလူးဝစ်ဟာ နောက်ထပ်နှစ်ပွဲပယ်ပြစ်ဒဏ်
ချမှတ်ခံခဲ့ရပါတယ်။
ရီကိုလူးဝစ်အနေနဲ့ ဘောလုံးကို လျှောထိုးဖျက်ထုတ်စဉ် အရှိန်လွန်ပြီး အိုဘန်းရဲ့မျက်နှာကို ကန်မိခဲ့တာပါ။
ရည်ရွယ်ချက်မပါပေမဲ့ ကြမ်းတမ်းတဲ့ကစားပုံကြောင့် ၈၈ မိနစ်မှာ ရီကိုလူးဝစ် အနီကတ်ပြသခံခဲ့ရတာဖြစ်တယ်။
ရီကိုလူးဝစ်(၂၂ နှစ်)ဟာ အခုပြစ်ဒဏ်ကြောင့် အလိုအလျောက် တစ်ပွဲပယ်ခံရပြီး ယူအေအီးကလပ် အယ်လ်အိန်းအသင်းကို ၆-၀ ဂိုးနဲ့ ဂိုးပြတ်အနိုင်ရတဲ့ပွဲကို လွဲချော်ခဲ့ရပါတယ်။
FIFA စည်းကမ်းထိန်းသိမ်းရေးကော်မတီက အခုအခါ နောက်ထပ်နှစ်ပွဲပယ် ထပ်မံသတ်မှတ်ခဲ့တာပါ။
မန်စီးတီးအသင်းက အယူခံဝင်ခဲ့ပေမဲ့ အောင်မြင်မှု မရခဲ့ပါဘူး။
ရီကိုလူးဝစ်ဟာ ဂျူဗင်တပ်စ်အသင်းနဲ့ကစားမယ့် အုပ်စုနောက်ဆုံးပွဲ၊ ၁၆ သင်းအဆင့်ပွဲစဉ်တွေကို လွဲချော်ရတော့မှာဖြစ်တယ်။
မန်စီးတီးအသင်းဟာ အုပ်စုတွင်း နှစ်ပွဲကစား နှစ်ပွဲနိုင်ကာ ၁၆ သင်းအဆင့် တက်ရောက်ထားပါတယ်။
