မန်ယူအသင်းဟာ ဘရန့်ဖို့ဒ်အသင်းက ကင်မရွန်းလက်ရွေးစင်တောင်ပံကစားသမား အမ်ဘူမိုကို တတိယအကြိမ် ကြေးတိုးမြှင့်ကမ်းလှမ်းခဲ့ပြီး ဒီတစ်ကြိမ်မှာတော့ ဘရန့်ဖို့ဒ်အသင်း လက်ခံလိမ့်မယ်လို့ မျှော်လင့်နေကြောင်း သိရပါတယ်။
မန်ယူအသင်းဟာ အမ်ဘူမို(၂၅ နှစ်)ကို ခေါ်ယူဖို့ နွေရာသီတစ်လျှောက်လုံး ကြိုးစားနေခဲ့တာဖြစ်ပြီး ပထမဆုံးအကြိမ်အဖြစ် ပေါင်(၄၅)သန်း+ Add-ons ကြေး ပေါင်(၁၀)သန်းနဲ့ ကမ်းလှမ်းခဲ့တာပါ။
အခု တတိယအကြိမ် ကမ်းလှမ်းမှုကတော့ ကနဦးပြောင်းရွှေ့ကြေး ပေါင်(၆၅)သန်း+ Add-ons ကြေး ပေါင်(၅)သန်းအထိ မြင့်တက်လာတာကြောင့် ဘရန့်ဖို့ဒ်အသင်းအနေနဲ့ လက်ခံနိုင်ဖွယ်ရှိကြောင်း သုံးသပ်မှုတွေလည်း ထွက်ပေါ်လာပါတယ်။
အမ်ဘူမိုဟာ ပြီးခဲ့တဲ့ရာသီမှာ ဘရန့်ဖို့ဒ်အသင်းအတွက် ပရီးမီးယားလိဂ်မှာ ဂိုး(၂၀)အထိ သွင်းယူကာ ခြေစွမ်းပြခဲ့သူဖြစ်ပြီး သူ့ကို ဘရန့်ဖို့ဒ်နည်းပြဟောင်း သောမတ်စ်ဖရန့်ခ်ကလည်း စပါးအသင်းဆီ ခေါ်ယူဖို့ ဆန္ဒရှိနေပါတယ်။
ဒါပေမဲ့ အမ်ဘူမိုက မန်ယူအသင်းကို ပြောင်းရွှေ့ဖို့ လိုလားနေတာကြောင့် မန်ယူအသင်းက အခွင့်သာနေပေမဲ့ ပြောင်းရွှေ့ကြေးအတွက် အဆင်မပြေဖြစ်နေသေးတာပါ။
မန်ယူနည်းပြ အာမိုရင်မ်ကတော့ အမ်ဘူမိုကို ရာသီကြိုခြေစမ်းခရီး ထွက်ခွာမယ့် အင်္ဂါနေ့မတိုင်ခင် ခေါ်ယူနိုင်ဖို့ မျှော်လင့်နေကြောင်း သိရပါတယ်။
