လီဗာပူးလ်ကနေ အာဆင်နယ်အသင်းကို ပြောင်းရွှေ့ခဲ့တဲ့ ကနေဒါလက်ရွေးစင်တိုက်စစ်မှူး အိုလီဗီယာစမစ်ဟာ အမျိုးသမီးဘောလုံးလောကမှာ ပြောင်းရွှေ့ကြေးပေါင်(၁)သန်းအမှတ် ရောက်ရှိတဲ့ ပထမဆုံးကစားသမားအဖြစ် မှတ်တမ်းဝင်သွားခဲ့ကြောင်း သိရပါတယ်။
အရင်က အမျိုးသမီးဘောလုံးလောကမှာ ပြောင်းရွှေ့ကြေး ပေါင်(၉၀၀၀၀၀)ပေးချေရတာက အမြင့်ဆုံးစံချိန်ဖြစ်ပြီး ပြီးခဲ့တဲ့ ဇန်နဝါရီအပြောင်းအရွှေ့ကာလမှာ အမေရိကန်နောက်ခံလူ နာအိုမီဂါမာကို ဆန်ဒီယေဂိုဝေ့ဗ်အသင်းဆီကနေ ချယ်လ်ဆီးအသင်းက ခေါ်ယူခဲ့တာဖြစ်ပါတယ်။
အခု အိုလီဗီယာစမစ်က အဲဒီစံချိန်ကို ချိုးဖျက်ပြီး အမျိုးသမီးဘောလုံးလောကရဲ့ တန်ဖိုးအကြီးဆုံးကစားသမားအဖြစ် စံချိန်သစ်တင်ခဲ့သလို၊ ပြောင်းရွှေ့ကြေးပေါင်(၁)သန်းအမှတ်ကို ရောက်ရှိတဲ့ ပထမဆုံးအမျိုးသမီးဘောလုံးသမားအဖြစ်လည်း မှတ်တမ်းဝင်ခဲ့တာပါ။
အိုလီဗီယာစမစ်(၂၀ နှစ်)ဟာ ၂၀၂၄ နွေရာသီမှာမှ စပို့တင်းလစ္စဘွန်းကနေ လီဗာပူးလ်အသင်းကို ပေါင်(၂၀၀၀၀၀)နဲ့ ပြောင်းရွှေ့လာခဲ့သူဖြစ်ပြီး အဲဒီပြောင်းရွှေ့ကြေးကလည်း လီဗာပူးလ်အသင်းရဲ့သမိုင်းမှာ စံချိန်သစ်ဖြစ်ခဲ့ပါတယ်။
အိုလီဗီယာစမစ်က အာဆင်နယ်အသင်းနဲ့ စာချုပ်ချုပ်ဆိုနိုင်ခဲ့တာ ဂုဏ်ယူစရာကောင်းကြောင်းနဲ့ အင်္ဂလန်ရော ဥရောပမှာပါ အမြင့်ဆုံးဆုဖလားတွေကို ရယူသွားဖို့က မိမိရဲ့ အိပ်မက်ဖြစ်ကြောင်း ပြောကြားခဲ့ပါတယ်။
