မြန်မာနေရှင်နယ်လိဂ်ကလပ် ရန်ကုန်ယူနိုက်တက်အသင်းဟာ မြန်မာ့လက်ရွေးစင် တောင်ပံတိုက်စစ်ကစားသမား ဟိန်းထက်အောင်ကို တစ်နှစ်စာချုပ်နဲ့ ခေါ်ယူလိုက်ပြီဖြစ်ကြောင်း ဇူလိုင် ၂၄ ရက်က တရားဝင်သတင်းထုတ်ပြန်ခဲ့ပါတယ်။
ဟိန်းထက်အောင်ဟာ မလေးရှားကလပ် ကီလန်တန်အသင်းကို ပြောင်းရွှေ့ဖို့ သဘောတူညီမှုရပြီးမှ အပြောင်းအရွှေ့ပျက်ပြယ်ခဲ့လို့ ရန်ကုန်ယူနိုက်တက်အသင်းကို ရောက်ရှိလာတာဖြစ်ပါတယ်။
မြန်မာဘောလုံးအကယ်ဒမီက ထွက်ပေါ်လာပြီး ပရော်ဖက်ရှင်နယ်ကစားသမားဘဝကို ဟံသာဝတီယူနိုက်တက်အသင်းမှာ စတင်ခဲ့တဲ့ ဟိန်းထက်အောင်ဟာ ၂၀၂၁ ခုနှစ်ကတည်းက မလေးရှားကလပ်တွေမှာ သွားရောက်ကစားနေတာဖြစ်ပါတယ်။
ဟိန်းထက်အောင်ဟာ မလေးရှားကလပ် ဆီလန်ဂေါအသင်းမှာ ၂၀၂၁ ကနေ ၂၀၂၄-၂၀၂၅ ရာသီကုန်အထိ ကစားခဲ့တာဖြစ်ပြီး နောက်ဆုံးနှစ်ရာသီမှာတော့ မလေးရှားကလပ် နီဂျီရီဆီဘန်လမ်အသင်းမှာ အငှားစာချုပ်နဲ့ သွားရောက်ကစားခဲ့တာဖြစ်ပါတယ်။
MNL League Cup ပြိုင်ပွဲမတိုင်ခင်ကတည်းက လက်ရွေးစင်အဆင့် ပြည်တွင်းကစားသမားတွေ၊ နိုင်ငံခြားသားကစားသမားတွေ ခေါ်ယူခဲ့တဲ့ ရန်ကုန်ယူနိုက်တက်အသင်းဟာ ချန်ပီယံဆုရရှိပြီးနောက်ပိုင်း အသင်းအင်အားပိုတောင့်တင်းလာအောင် အားဖြည့်မှုတွေ ထပ်မံပြုလုပ်နေတာဖြစ်ပါတယ်။
