■ ဒွန်နာရမ်မာကို ခေါ်ယူဖို့ မန်ချက်စတာယူနိုက်တက်အသင်း ဆွေးနွေးနေ

မန်ချက်စတာယူနိုက်တက်အသင်းဟာ PSG ဂိုးသမား ဒွန်နာရမ်မာကို ခေါ်ယူဖို့ ဆွေးနွေးမှုတွေ ပြုလုပ်နေတယ်လို့ သိရပါတယ်။

အသက် (၂၆) နှစ်အရွယ် အီတလီလက်ရွေးစင်ဂိုးသမား ဒွန်နာရမ်မာဟာ PSG အသင်းနဲ့ စာချုပ်သက်တမ်း တစ်နှစ်သာ ကျန်ရှိတော့ပြီး အခုနွေမှာ အသင်းပြောင်းရွှေ့ဖွယ်ရှိနေတယ်လို့ သတင်းထွက်နေတာပါ။

PSG အသင်းဟာ ဘာပေကို ပြောင်းရွှေ့ကြေးအလွတ်နဲ့ ရီးယဲလ်မက်ဒရစ်အသင်းဆီကို လက်လွှတ်လိုက်ရတဲ့ ဖြစ်ရပ်မျိုးကို ရှောင်ရှားနိုင်ဖို့အတွက် အခုနွေမှာ ဒွန်နာရမ်မာကို ရောင်းထုတ်ဖို့ ဆန္ဒရှိနေတယ်လို့ သိရပါတယ်။

The Telegraph ရဲ့ ဖော်ပြချက်အရ မန်ချက်စတာယူနိုက်တက်အသင်းဟာ ဒွန်နာရမ်မာကို ခေါ်ယူဖို့အတွက် လက်ရှိမှာ PSG အသင်းနဲ့ ဆွေးနွေးနေတယ်လို့ သိရပါတယ်။

မန်ချက်စတာယူနိုက်တက်အသင်းအနေနဲ့ အသင်းဂိုးသမား အိုနာနာရဲ့ နေရာမှာ အစားထိုးဖို့ ထိပ်တန်းဂိုးသမားတစ်ဦး ရှာဖွေနေပြီး အက်စတွန်ဗီလာဂိုးသမား မာတီနက်ဇ်ကို ခေါ်ယူဖို့ ကြိုးစားမှုအဆင်မပြေဖြစ်ပြီးနောက် ဒွန်နာရမ်မာကို ခေါ်ယူဖို့ ကြိုးပမ်းလာတာလည်း ဖြစ်ပါတယ်။