■ အဲဗာတန်ကို ပြောင်းရွှေ့ကစားဖို့ ဂရီးလစ်ရှ်ကို ဘယ်ရီ တိုက်တွန်း

အဲဗာတန်ကွင်းလယ်လူဟောင်း ဘယ်ရီက မန်စီးတီးတိုက်စစ်ကစားသမား ဂရီးလစ်ရှ်ကို အဲဗာတန်အသင်းသို့ ပြောင်းရွှေ့ကစားဖို့ တိုက်တွန်းပြောကြားခဲ့ပါတယ်။

အသက် (၂၉) နှစ်အရွယ် အင်္ဂလန်လက်ရွေးစင်တိုက်စစ်ကစားသမား ဂရီးလစ်ရှ်ဟာ ၂၀၂၅ ဖီဖာကလပ်ကမ္ဘာ့ဖလားပြိုင်ပွဲ ယှဉ်ပြိုင်ခဲ့ရတဲ့ မန်စီးတီးအသင်းရဲ့ လူစာရင်းကနေ ချန်လှပ်ခံခဲ့ရသလို နည်းပြ ဂွါဒီယိုလာရဲ့ အနာဂတ်အစီအစဉ်တွေမှာ မပါဝင်တာကြောင့် အခုနွေမှာ အသင်းပြောင်းရွှေ့ကစားဖို့ စီစဉ်နေတာပါ။

လက်ရှိမှာ သူ့ကို ခေါ်ယူဖို့ စီးရီးအေချန်ပီယံ နာပိုလီအသင်းနဲ့ အဲဗာတန်အသင်းတို့က စိတ်ဝင်စားနေပြီး ဂရီးလစ်ရှ်အနေနဲ့ မန်စီးတီးအသင်းဖော်ဟောင်း ဒီဘရိုင်းနား ရှိနေတဲ့ နာပိုလီအသင်းထံ ပြောင်းရွှေ့ကစားဖွယ်ရှိတယ်လို့ သတင်းထွက်နေပါတယ်။

ဒါပေမဲ့ အဲဗာတန်ကွင်းလယ်ကစားသမားဟောင်း ဘယ်ရီက ဂရီးလစ်ရှ်ကို အဲဗာတန်အသင်းသို့ ပြောင်းရွှေ့ကစားဖို့ တိုက်တွန်းပြောကြားခဲ့တာ ဖြစ်ပါတယ်။

ဘယ်ရီက "ကျွန်တော်သာ ဂရီးလစ်ရှ်ဆိုရင် ကျွန်တော့်ကို အထင်သေးနေတဲ့သူတွေကို သူတို့ မှားယွင်းကြောင်း သက်သေပြမှာပါ။ လူတွေက ဂရီးလစ်ရှ် ဘာမှမဟုတ်တော့ဘူးလို့ ထင်နေကြပါတယ်။ ဂရီးလစ်ရှ်အနေနဲ့ ပုံမှန်ပွဲကစားခွင့်ရမယ်ဆိုရင် အင်္ဂလန်လက်ရွေးစင်အသင်းမှာတောင် ကစားခွင့်ရနိုင်သေးတယ်လို့ တွေးနေမှာပါ။ ဒီတော့ ဂရီးလစ်ရှ်အနေနဲ့ အဲဗာတန်အသင်းကို ပြောင်းရွှေ့ကစားတာဟာ အကောင်းဆုံးဖြစ်မယ်လို့ ကျွန်တော် ထင်ပါတယ်"လို့ ပြောကြားခဲ့ပါတယ်။