လိုက်ပ်ဇစ်ကနေ မန်ယူအသင်းကို ပြောင်းရွှေ့လာတော့မယ့် ဆလိုဗေးနီးယားတိုက်စစ်မှူး ရှက်ရှကိုဟာ ရောက်ရောက်ချင်း တစ်ပတ်ပေါင်(၁၆၀၀၀၀)သာ ရရှိမှာဖြစ်ပေမဲ့ ချန်ပီယံလိဂ်ဝင်ခွင့်ရရှိခဲ့ရင် တစ်ပတ်ပေါင်(၂၀၀၀၀၀)ရရှိသွားမယ်လို့ သိရပါတယ်။
မန်ယူအသင်းဟာ ရှက်ရှကို ကနဦးပြောင်းရွှေ့ကြေး ပေါင်(၆၆.၃)သန်းနဲ့ Add-ons ကြေး ပေါင်(၇.၄)သန်း ပေးချေပြီး ခေါ်ယူဖို့ သဘောတူညီမှုရရှိခဲ့ပြီး ရှက်ရှကိုနဲ့လည်း လစာနှုန်းထား၊ စာချုပ်သက်တမ်းတွေအတွက် သဘောတူညီမှု ရရှိခဲ့ပါပြီ။
ဒါကြောင့် ရှက်ရှကို(၂၂ နှစ်)က ဒီနေ့ မန်ယူအသင်းနဲ့ ဆေးစစ်မှု ခံယူသွားမယ်လို့ သိရပါတယ်။
မန်ယူအသင်းက စနေနေ့မှာ ဖီအိုရင်တီးနားအသင်းနဲ့ အိုးလ်ထရက်ဖို့ဒ်မှာ ခြေစမ်းပွဲ ယှဉ်ပြိုင်ကစားဖို့ စီစဉ်ထားပြီး အဲဒီပွဲမှာ ရှက်ရှကိုကို ကစားသမားသစ်အဖြစ် မိတ်ဆက်ပေးဖွယ်ရှိကြောင်း သိရပါတယ်။
ရှက်ရှကိုဟာ ဒီနှစ် နွေရာသီအပြောင်းအရွှေ့ကာလမှာ မန်ယူအသင်း ခေါ်ယူတဲ့ စတုတ္ထမြောက်ကစားသမားသစ်အဖြစ် မှတ်တမ်းဝင်မှာဖြစ်ကြောင်း သိရပါတယ်။
