■ ချန်ပီယံလိဂ်ပုံစံ ပြောင်းလဲမယ့်သတင်းများကို UEFA ငြင်းဆန်

ဥရောပဘောလုံးအဖွဲ့ချုပ်(UEFA)က ချန်ပီယံလိဂ်ပုံစံ ပြောင်းလဲမယ့်သတင်းများကို ငြင်းဆန်ခဲ့ပါတယ်။

UEFAနဲ့ စူပါလိဂ်အကြား တွေ့ဆုံဆွေးနွေးမှုများ ပြုလုပ်ခဲ့တယ်လို့ သတင်းများထွက်ပေါ်လာပြီးနောက် UEFA အခုလို တုံ့ပြန်ခဲ့တာပါ။

စပိန်သတင်းစာ Mundo Deportivo သတင်းစာက ပြီးခဲ့တဲ့လများအတွင်း UEFA ဟာ စူပါလိဂ်စီမံကိန်းကို အဓိကဖော်ဆောင်နေတဲ့ A22 ကုမ္ပဏီ၊ ရီးယဲလ်မက်ဒရစ်၊ ဘာစီလိုနာအသင်းတို့က ကိုယ်စားလှယ်တွေနဲ့ ကြိမ်ဖန်များစွာ ဆွေးနွေးခဲ့တယ်လို့
စနေနေ့မှာ ရေးသားခဲ့ပါတယ်။

ဒီသတင်းမှာ အသင်းကြီးတွေအကြား ထိပ်တိုက်ယှဉ်ပြိုင်တဲ့ပွဲ ပိုများရေးနဲ့ ပွဲတွေကို အခမဲ့ထုတ်လွှင့်ခွင့်စတဲ့ စူပါလိဂ်မော်ဒယ်နဲ့ အနီးစပ်ဆုံးဖြစ်အောင် ချန်ပီယံလိဂ်ပြိုင်ပွဲကို ပြုပြင်ပြောင်းလဲမှုလုပ်ဖို့ ဆွေးနွေးခဲ့ကြပေမဲ့ သဘောတူညီမှု မရခဲ့ဘူးလို့
ဖော်ပြထားပါတယ်။

စူပါလိဂ်စီမံကိန်းနဲ့ နီးစပ်တဲ့ သတင်းရင်းမြစ်တစ်ခုက UEFA နဲ့ တွေ့ဆုံဆွေးနွေးခဲ့တယ်ဆိုတာကို အတည်ပြုခဲ့ပါတယ်။

UEFA က ''UEFA အထွေထွေအတွင်းရေးမှူး သီယိုဒေါ်ရီဒစ်နဲ့ A22 ပူးတွဲတည်ထောင်သူ မစ္စတာ အာနက်စ်လာရာရီတို့ အကြိမ်အနည်းငယ်တွေ့ဆုံခဲ့တာကို အတည်ပြုပါတယ်။ ဒီတွေ့ဆုံမှုတွေဟာ လူသိရှင်ကြား ဖြစ်ခဲ့ပြီး လျှို့ဝှက်ထားတယ်ဆိုတာက
လုံးဝမှားပါတယ်။ ဒီဆွေးနွေးပွဲတွေကနေ ဘာမှ တရားဝင်ရလဒ် မထွက်ခဲ့ပါဘူး။ UEFA ချန်ပီယံလိဂ်ပုံစံကို ပြောင်းလဲဖို့မရှိဘူးဆိုတာကို အတိအလင်း ထပ်မံကြေညာပါမယ်''လို့ သတင်းထုတ်ပြန်ခဲ့ပါတယ်။

လက်ရှိ အသင်းပေါင်း ၃၆ သင်းနဲ့ အုပ်စုခွဲဝေမှုအစား league phase ပုံစံ ကျင်းပနေတဲ့ ချန်ပီယံလိဂ်ပြိုင်ပွဲကို ၂၀၂၄-၂၅ ရာသီကမှ စတင်ခဲ့တာဖြစ်ပါတယ်။