ပခုက္ကူမြို့အနီး ဧရာဝတီမြစ်ရေမှာ ယခုသြဂုတ်လ ၁၀ ရက် မွန်းလွဲပိုင်းတွင် စိုးရိမ်ရေအမှတ် ၂၁၅၀ စင်တီမီတာသို့ ရောက်ရှိလာပြီး မြစ်ကမ်းအနီး အနိမ့်ပိုင်းနေထိုင်သူများ စတင်ရွှေ့ပြောင်းနေပြီဖြစ်ကြောင်း သိရသည်။
မြစ်ရေဆက်တိုက် မြင့်တက်လာသည့်အတွက် အနိမ့်ပိုင်းရပ်ကွက်ရှိလူနေအိမ်များထိ မြစ်ရေဝင်ရောက် လာပြီး ယနေ့မနက်မှ စတင်ရွှေ့ပြောင်းနေပြီဖြစ်ကြောင်း သိရသည်။
“ကျွန်တော်တို့ အမှတ် ၁ အနိမ့်ပိုင်းကတော့ အိမ်ခြေ ၃၀ လောက် ပြောင်းဖို့ စာရင်းပေးထားတယ်။ လောလော ဆယ် သူတို့စားဝတ်နေရေးလေး စီစဉ်နေကြတယ်။ သက်ဆိုင်ရာကတော့ အဖွဲ့စုံလိုက်ကြည့်နေတယ် ” ဟု အမှတ် ၁ ရပ်ကွက် နေထိုင်သူတစ်ဦးက ပြောသည်။
ပခုက္ကူမြို့အနီး ဧရာဝတီမြစ်ရေမှာ စိုးရိမ်ရေအမှတ်အထက် ၂ ပေကျော်ထိ ရောက်ရှိနိုင်ပြီး ရေတက်ရက် ၃ ရက်ခန့် ကျန်ရှိကြောင်းသိရပြီး ရေဘေးရှောင်သူ ပိုမိုများပြားလာနိုင်ကြောင်း သိရသည်။
ပြီးခဲ့သည့် ၂၀၂၄ ခုနှစ် ဇူလိုင်လတွင် ပခုက္ကူမြို့အနီး ဧရာဝတီမြစ်ရေမှာ စိုးရိမ်ရေအမှတ်အထက် ၄ပေခွဲထိ ကျော်လွန်ရောက်ရှိခဲ့ပြီး ဒေသခံအများအပြား ရွှေ့ပြောင်းမှု ပြုလုပ်ခဲ့ရသည်။
