အာရှ-ပစိဖိတ်ဒေသသို့ နေတိုးမဟာမိတ်အဖွဲ့ထိုးဖောက်ဝင်ရောက်ခြင်းကရုရှားအတွက် ခြိမ်းခြောက်မှုဖြစ်နေသည်ဟု ရုရှားသမ္မတ ဗလာဒီမီယာပူတင်က ပြောကြားခဲ့သည်။
TASS သတင်းဌာန၏ ဖော်ပြချက်အရ သမ္မတ ပူတင်သည် ဂျပန်နိုင်ငံနှင့် နီးကပ်သည့် ရုရှားအရှေ့ဖျားဒေသရှိ Yuzhno -Sakhalinsk မြို့သို့ ဩဂုတ် ၁၂ ရက်တွင် သွားရောက်စဉ် "ဒီဒေသမှာ ပဋိပက္ခဖြစ်ပွားနိုင်ခြေ ပိုမိုမြင့်မားလာတာကိုကျွန်တော်တို့စိတ်မကောင်းစွာ မြင်တွေ့နေရပါတယ်" ဟု ပြောဆိုခဲ့ပြီး "နေးတိုးဟာ ဒီဒေသထဲ ထိုးဖောက်ဝင်ရောက်နေသလို စစ်ရေးနဲ့ နိုင်ငံရေး မဟာမိတ်အဖွဲ့သစ်တွေကိုလည်း ဖွဲ့စည်းနေပါတယ်" ဟုပြောကြားခဲ့သည်။
"ဒီဒေသမှာ လက်နက်စနစ်သစ်တွေကို တပ်ဆင်နေသလို ထပ်မံတပ်ဆင်ဖို့ စီမံကိန်းတွေလည်း ရေးဆွဲနေကြတာကြောင့် ဒါဟာ ကျွန်တော်တို့နိုင်ငံအတွက် ခြိမ်းခြောက်မှုတစ်ခု ဖြစ်နေပါတယ်" ဟု ဆက်လက်ပြောကြားခဲ့သည်။
သို့သော် မည်သည့် နေတိုးလက်နက်စနစ်များ ဖြန်ကြက်ထားသလဲဆိုသည်ကို ပူတင်က အသေးစိတ် ပြောကြားခဲ့ခြင်းမရှိပေ။
နေတိုးအဖွဲ့၏ အင်ဒို-ပစိဖိတ် မိတ်ဖက်နိုင်ငံအဖြစ် တောင်ကိုရီးယားနှင့်အတူ ပါဝင်နေသည့် ဂျပန်နှင့် ပတ်သက်၍မကျေနပ်ကြောင်းပြောကြားရာတွင် ပူတင်က "ဂျပန်ဟာယူကရိန်းအရေးရဲ့ အရင်းခံအကြောင်းတွေကို မသိဘဲ ရုရှားကိုတစ်ဖက်သတ် ပိတ်ဆို့မှုတွေ လုပ်ခဲ့ပါတယ်" ဟုပြောဆိုခဲ့သည်။
အထူးသဖြင့် ဝန်ကြီးချုပ် ဆာနာအဲတာကာအိချိဦးဆောင်သောဂျပန်အစိုးရအဖွဲ့သည် ယခုလဆန်းပိုင်းက ထုတ်ပြန်ခဲ့သော ကာကွယ်ရေးစက္ကူဖြူစာတမ်းတွင် ရုရှား၊ မြောက်ကိုရီးယားနှင့် တရုတ်တို့၏ စစ်ရေး နီးကပ်သည့် ဆက်ဆံရေးကို ကိုးကား၍ ယူကရိန်းကို ကျူးကျော်ခဲ့သည့် အခြေအနေမျိုး အရှေ့အာရှတွင် ဖြစ်ပွားလာနိုင်ခြေရှိသည်ဟု ဖော်ပြခဲ့ခြင်းကို ပူတင်က ဝေဖန်ခဲ့သည်။
ပူတင်က "ကျွန်တော်တို့ဟာ ဂျပန်နိုင်ငံကို ခြိမ်းခြောက်နေတာ မဟုတ်ပါဘူး၊ ဂျပန်ရဲ့နယ်မြေတွေကိုတောင်းဆိုဝာာလည်းမရှိပါဘူး" ဟု ဆက်လက်ပြောကြားခဲ့သည်။
ဒုတိယကမ္ဘာစစ်ကတည်းကရုရှားထိန်းချုပ်ထားသော ကူရီးလ်ကျွန်းလေးကျွန်းကို ဂျပန်ကမြောက်ပိုင်းနယ်မြေများဟုခေါ်ပြီးထိုကျွန်းများ၏အချုပ်အခြာပိုင်ဆိုင်မှုနှင့်ပတ်သက်၍အငြင်းပွားမှုများဖြစ်ပေါ်နေခြင်းကို ပူတင်က"ဒါဟာ ဒုတိယကမ္ဘာစစ်အပြီး ပေါ်ပေါက်လာတဲ့ အရှိတရား ဖြစ်ပြီး အပြည်ပြည်ဆိုင်ရာ စာရွက်စာတမ်းတွေမှာလည်း သတ်မှတ်ထားပြီးသား ဖြစ်ပါတယ်" ဟု ပြောကြားခဲ့သည်။
Ref:SBS News
Photos:AFP
