မြန်မာနိုင်ငံတွင် အသက်အကြီးဆုံး အသက်(၁၂၁ )နှစ် အဘွားဒေါ်ပန်းနွယ်နေအိမ်သို့ တနင်္သာရီတိုင်းဒေသကြီးဝန်ကြီးချုပ်ဦးဇော်နိုင်ဦးက သွားရောက်ဂါရဝပြု၍ အလှူငွေနှင့် စားသောက်ဖွယ်ပစ္စည်းများပေးအပ်လှူဒါန်းခဲ့ကြောင်း သိရသည်။
သြဂုတ် ၁၂ ရက်တွင် တနင်္သာရီတိုင်းဒေသကြီး၊ ကော့သောင်းခရိုင်၊ ကော့သောင်းမြို့နယ်မှ အသက် (၁၂၁) နှစ် အဘွားဒေါ်ပန်းနွယ်နေအိမ်သို့ တနင်္သာရီတိုင်းဒေသကြီး ဝန်ကြီးချုပ်ဦးဇော်နိုင်ဦးနှင့် တာဝန်ရှိသူများက အတူသွားရောက်တွေ့ဆုံဂါရဝပြုပြီး အလှူငွေကျပ် (၁၂၂ )သိန်း ၊ ကန်တော့ပစ္စည်းများ၊ သစ်သီးများ၊ ဆန်၊ ဆီ၊ ကြက်ဥနှင့် အသုံးအဆောင်ပစ္စည်းများ လှူဒါန်းကန်တော့၍အားပေးစကား ပြောကြားခြင်း၊ ကျန်းမာရေး စောင့်ရှောက်မှုပေးခြင်းနှင့်လိုအပ်သည်များဖြည့်ဆည်းပေးခြင်းများ ဆောင်ရွက်ပေးခဲ့ကြောင်း သိရသည်။
အဘွားဒေါ်ပန်းနွယ်သည် ၂၀၂၅ ခုနှစ် အောက်တိုဘာ ၁ ရက်နေ့တွင်ကျရောက်ခဲ့သည့် အပြည်ပြည်ဆိုင်ရာ အသက်ကြီးပုဂ္ဂိုလ်များနေ့အတွက် အသက် (၁၂၁) နှစ်ဖြင့် မြန်မာတစ်နိုင်ငံလုံး အသက်အကြီးဆုံး ဘိုးဘွားအဖြစ်ဂုဏ်ပြုချီးမြှင့်ခံရသူ အဘွားတစ်ဦးဖြစ်ကြောင်း သိရသည်။
ထို့အပြင် ကော့သောင်းမြို့နယ်၊ ချမ်းဖန်းကျေးရွာအုပ်စု၊ သီရိမြိုင်ရပ်ကွက်၊ ရွှေပြည်သာရပ်ကွက်၊ အေးရိပ်ငြိမ်ရပ်ကွက်တို့မှ အသက် (၁၀၀)နှစ်နှင့်အထက် သက်ကြီးဘိုးဘွား( ၇ )ဦးအား ဝန်ကြီးချုပ်နှင့်တာဝန်ရှိသူများက ခရိုင်အထွေထွေအုပ်ချုပ်ရေးဦးစီးဌာနဧည့်ရိပ်သာတွင် တွေ့ဆုံဂါရဝပြု၍ ဘိုးဘွားတစ်ဦးလျှင် အလှူငွေကျပ်(၁၀)သိန်း၊ ကန်တော့ပစ္စည်းများ၊ ဆန်နှင့်ဆီများပေးအပ်လှူဒါန်းခဲ့ကြကာ ကျန်းမာရေးစောင့်ရှောက်မှုပေးခြင်းများဆောင်ရွက်ခဲ့ပြီး ဘိုးဘွားများ၏ မိသားစုဝင်များနှင့် တွေ့ဆုံစကားပြောကြားခဲ့ကြောင်း သိရသည်။
