နီပေါ၌ ယခုသီတင်းပတ်အတွင်း ဖြစ်ပွားခဲ့သည့် ရုတ်တရက် ရေကြီးရေလျှံမှုကြောင့် မျှောပါသွားခဲ့သူများ၏ ရုပ်အလောင်းများကို မိုင် ၁၀၀ ကျော်ဝေးသည့် အိန္ဒိယနယ်စပ်တွင် ပြန်လည်တွေ့ရှိနေရပြီး၊ မြန်မြန်ပုပ်ပွလာသောအလောင်းများ၏စိန်ခေါ်မှုများကိုကယ်ဆယ်ရေးအဖွဲ့များရင်ဆိုင်နေရချိန်တွင် ပျောက်ဆုံးနေသူများကို အချိန်နှင့်တစ်ပြေးညီ ရှာဖွေနိုင်ရန် ကြိုးပမ်းလျက်ရှိသည်။
နီပေါနိုင်ငံနှင့် နယ်နိမိတ်ချင်း ထိစပ်နေသည့် အိန္ဒိယနိုင်ငံမြောက်ပိုင်း ဥတ္တာပရာဒေ့ရှ်နှင့် ဘီဟာပြည်နယ်တို့တွင် ရေဘေးသင့်ရာ ဒေသမှ မိုင် ၁၀၀ ကျော် ကွာဝေးသည့် ရုပ်အလောင်း ၈ လောင်းကို ရှာဖွေတွေ့ရှိခဲ့သည်။
ထို့အပြင် ဩဂုတ် ၂၆ ရက် နံနက်ပိုင်း က ပေ ၇၀ အမြင့်ရှိ ရေခဲ၊ ရွှံ့နွံနှင့် ရေလှိုင်းကြီးများ ရိုက်ခတ်ခဲ့သည့် ရက်ဆူဝါခရိုင်မှ မိုင် ၂၅၀ ခန့် ဝေးသော နီပေါနိုင်ငံတွင်းရှိ လုမ္ဗိနီပြည်နယ်၌လည်း အခြားရုပ်အလောင်း တစ်လောင်းကို ထပ်မံဆယ်ယူရရှိခဲ့သည်။
ဥတ္တာပရာဒေးရှ်ပြည်နယ်၊ မဟာရာဂျ်ဂန့်ဂျ်ခရိုင်ရှိ မြစ်အတွင်းမှ ရုပ်အလောင်းလေး လောင်းကို ဆယ်ယူရရှိခဲ့ပြီး အဆိုပါအလောင်းများမှာ ဆိုဆိုးရွားရွား ပုပ်ပွနေပြီဖြစ်၍ မည်သူမည်ဝါဖြစ်ကြောင်း အတည်ပြုနိုင်ရန် ခရိုင်ဆေးရုံ၏ရင်ခွဲရုံ၌ ထားရှိကြောင်း တာဝန်ရှိသူများက ပြောကြားသည်။
"ဒီကိစ္စနဲ့ ပတ်သက်လို့ နီပေါအစိုးရအဖွဲ့နဲ့ ဆက်သွယ်ဆောင်ရွက်နေပါတယ်" ဟု အဆိုပါခရိုင်မှ အုပ်ချုပ်ရေးမှူး ဂေါရဗ်ဆင်းဆိုးဂါဝါလ်က ပြောသည်။ ဒေသတွင်း၌ ရေမှတ်မြင့်တက်ခဲ့သော်လည်း လက်ရှိတွင် ရေကြီးရေလျှံမှု အန္တရာယ် လျော့ပါးသွားပြီဟု သူက ဆက်လက်ပြောကြားသည်။
အလားတူ ဥတ္တာပရာဒေ့ရှ်ပြည်နယ်ရှိဂန်ဒတ်မြစ်အတွင်းမှ ရုပ်အလောင်းသုံး လောင်းနှင့် ဘီဟာပြည်နယ် ဗာလ်မီကီနာဂါဆည် အနီးရှိ အဆိုပါမြစ်အတွင်းမှ ရုပ်အလောင်းတစ်လောင်း ထပ်မံဆယ်ယူရရှိခဲ့သည်။
သဘာဝဘေးအန္တရာယ် ဖြစ်ပွားခဲ့ပြီး သုံးရက်အကြာတွင် ပြန်လည်တွေ့ရှိရသည့်ရုပ်အလောင်း အများစုမှာ မည်သူမည်ဝါဖြစ်ကြောင်း မမှတ်မိနိုင်လောက်အောင် ပုပ်ပွနေပြီဟု အာဏာပိုင်များက ပြောကြားသည်။
ကျန်းမာရေးဆိုင်ရာ စိန်ခေါ်မှုများနှင့် ကူးစက်ရောဂါ ဖြစ်ပွားမည်ကို စိုးရိမ်ရသည့်အတွက် တရားဥပဒေကြောင်းအရ လုပ်ထုံးလုပ်နည်းများ ပြီးစီးပါက အမြန်ဆုံး သင်္ဂြိုဟ်သွားမည်ဟု သိရသည်။
Ref: Independent
AFP photos
