လီဗာပူးလ်အသင်းရဲ့ အာဂျင်တီးနားကွင်းလယ်ကစားသမား မက်အယ်လစ္စတာက သက်တမ်းတိုးစာချုပ်သစ် ချုပ်ဆိုဖို့ ကမ်းလှမ်းခြင်းမခံရတဲ့အတွက် အလွန်ဝမ်းနည်းခဲ့ရကြောင်း ထုတ်ဖော်ပြောကြားခဲ့ပါတယ်။
မက်အယ်လစ္စတာက အက်သလက်တီကိုနဲ့ ယှဉ်ပြိုင်ရမယ့် ချန်ပီယံလိဂ်ပွဲအတွက် ပြုလုပ်ခဲ့တဲ့ ပွဲကြိုသတင်းစာရှင်းလင်းပွဲမှာ သူ့ရဲ့အနာဂတ်နဲ့ပတ်သက်ပြီး အခုလို ပြောကြားခဲ့တာပါ။
''အသင်းက ကျွန်တော့်ကို စာချုပ်သစ်အတွက် ကမ်းလှမ်းဖို့ အစီအစဉ်မရှိဘူးဆိုတဲ့သတင်းတွေ ကျွန်တော် ကြားသိခဲ့ရပါတယ်။ အဲဒီအတွက် ကျွန်တော် အရမ်းအရမ်းကို ဝမ်းနည်းခဲ့ရပါတယ်။ လေ့ကျင့်မှုမှာရော ပွဲအတွင်းမှာရော အသင်းအတွက် ကျွန်တော် နေ့တိုင်း (၁၀၀)ရာခိုင်နှုန်း ပေးအပ်တယ်ဆိုတာ အားလုံး မြင်နိုင်ပါတယ်။ ဂရာဗန်ဘာ့ချ်နဲ့ ဆိုဘိုဆလိုင်းတို့ စာချုပ်သစ်ချုပ်ဆိုနိုင်ခဲ့တဲ့အတွက် ကျွန်တော် ပျော်ရွှင်မိပါတယ်။ တစ်ချိန်တည်းမှာ ဝမ်းနည်းခဲ့ရပါတယ်။ ပရိသတ်တွေအနေနဲ့ စိတ်ပူဖို့တော့ မလိုပါဘူး။ နောက်ဆုံးနေ့အထိ ကျွန်တော် (၁၀၀)ရာခိုင်နှုန်း ပေးဆပ်သွားမှာဖြစ်တာကြောင့်ပါ'' လို့ အယ်လစ္စတာက ပြောကြားခဲ့ပါတယ်။
အယ်လစ္စတာ(၂၇ နှစ်)က လီဗာပူးလ်အသင်းနဲ့ ၂၀၂၈ ခုနှစ်အထိ စာချုပ်ချုပ်ဆိုထားသူဖြစ်ပြီး ပြီးခဲ့တဲ့နွေရာသီမှာ လီဗာပူးလ်အသင်းက ရောင်းထုတ်ဖို့အတွက် ကမ်းလှမ်းမှုတွေကို စောင့်မျှော်ခဲ့ကြောင်း သိရပါတယ်။
အယ်လစ္စတာကို မန်စီးတီးနဲ့ ရီးယဲလ်မက်ဒရစ်တို့က ခေါ်ယူဖို့ စိတ်ဝင်စားကြောင်းလည်း သတင်းထွက်ခဲ့ပါတယ်။
