■ထိုင်းနိုင်ငံတွင် HIV ကူးစက်မှုအသစ်များအနက် သုံးပုံတစ်ပုံက လူငယ်များဖြစ်နေ

ထိုင်းနိုင်ငံတွင် နှစ်စဉ်တိုးပွားလာသည့် HIV ကူးစက်မှုအသစ်များအနက် သုံးပုံတစ်ပုံက အသက် ၁၅ နှစ်မှ ၂၄ နှစ်အတွင်း လူငယ်များဖြစ်နေသည်ကို တွေ့ရသည်။ ယင်းအခြေအနေက ၂၀၃၀ ခုနှစ်တွင် AIDS ကို ပြည်သူ့ကျန်းမာရေးပြဿနာအဖြစ် အဆုံးသတ်နိုင်ရန် ကြိုးပမ်းနေသည့် ထိုင်းနိုင်ငံအတွက် အဓိကစိန်ခေါ်မှုတစ်ရပ် ဖြစ်လာသည်။

ထိုင်းနိုင်ငံသည် HIV ကာကွယ်ရေးနှင့် ကုသရေးလုပ်ငန်းများတွင် ယခင်ကထက် သိသိသာသာ တိုးတက်လာသော်လည်း လူမှုအသိုင်းအဝိုင်းအတွင်း HIV နှင့်ပတ်သက်သည့် အမြင်နှင့် ခွဲခြားဆက်ဆံမှုများ၊ မိမိ၏ HIV အခြေအနေကို မသိရှိခြင်း၊ လိင်ကျန်းမာရေးအန္တရာယ်နှင့် ပတ်သက်သည့် အသိပညာရှိသော်လည်း လက်တွေ့အပြုအမူနှင့် ကွာဟနေခြင်းတို့က အဟန့်အတားများအဖြစ် ဆက်လက်ရှိနေသည်။

ရောဂါထိန်းချုပ်ရေးဦးစီးဌာန၏ ၂၀၂၆ ခုနှစ် အချက်အလက်များအရ တတိယသုံးလပတ်အထိ ထိုင်းနိုင်ငံတွင် HIV ရှိသူ ၅၆၅,၀၁၈ ဦးကျော်ရှိပြီး ကူးစက်မှုအသစ် ၁၅,၅၇၈ ခု မှတ်တမ်းတင်ထားသည်။ အသက် ၂၅ နှစ်မှ ၄၉ နှစ်အတွင်းအုပ်စုက အများဆုံးပါဝင်နေသည်။

ထိုင်းနိုင်ငံ၏ AIDS အဆုံးသတ်ရေး မဟာဗျူဟာအရ ၂၀၃၀ ခုနှစ်တွင် အဓိကရည်မှန်းချက်သုံးရပ်ကို အကောင်အထည်ဖော်ရန် သတ်မှတ်ထားသည်။ HIV ကူးစက်မှုအသစ်များ တစ်နှစ်လျှင် ၁,၀၀၀ အောက်အထိ လျှော့ချရန် ၊ HIV နှင့်ဆက်နွယ်သည့်သေဆုံးမှုများ တစ်နှစ်လျှင် ၄,၀၀၀ အောက်အထိ လျှော့ချရန်၊ HIV နှင့် ကျား၊မရေးရာအပေါ် အခြေခံသည့် အမြင်နှင့် ခွဲခြားဆက်ဆံမှုများကို ၁၀ ရာခိုင်နှုန်းအောက်အထိ လျှော့ချရန် တို့ ဖြစ်သည်။

Ref: Nation Thailand