တနင်္သာရီတိုင်းဒေသကြီး ခမောက်ကြီးမြို့နယ်တွင် တောင်ကျရေဆင်းလာမှုကြောင့် အရေးပေါ်ကူညီကယ်ဆယ်ရေးလုပ်ငန်းများ လုပ်ဆောင်ခဲ့ရကြောင်း သိရသည်။
တနင်္သာရီတိုင်းဒေသကြီး ကော့သောင်းခရိုင် ခမောက်ကြီးမြို့နယ်တွင် စက်တင်ဘာ ၁၇ ရက် ညပိုင်းအချိန်၌ မိုးသည်းထန်စွာ ရွာသွန်းပြီး တောင်ကျရေစီးဆင်းမှုကြောင့် ခမောက်ကြီးချောင်း ရေမြင့်တက်ကာ ရပ်ကွက် (၁) အတွင်း ရေဝင်ရောက်မှုများဖြစ်ပွားခဲ့ကြောင်း သိရသည်။
တောင်ကျရေများ ဆင်းလာမှုကြောင့် နေအိမ်များ ရေနစ်မြုပ်ခဲ့ရသကဲ့သို့ ရန်ကုန်-မြိတ်-ကော့သောင်း ပြည်ထောင်စုလမ်းမကြီး၏ အစိတ်အပိုင်းများလည်း ရေလွှမ်းခဲ့ကြောင်း ဒေသခံများက ပြောကြားသည်။
ရေနစ်မြုပ်မှုခံစားခဲ့ရသည့် ရေဘေးသင့်ပြည်သူများကို တပ်မတော်သားများ၊ ရဲတပ်ဖွဲ့၊ မီးသတ်တပ်ဖွဲ့၊ လူမှုကူညီရေးနှင့် ပရဟိတအဖွဲ့များ၊ ဒေသခံများ ပူးပေါင်း၍ ယာယီကယ်ဆယ်ရေးစခန်းများ ဖွင့်လှစ်ခြင်း၊ ဘေးလွတ်ရာသို့ ရွှေ့ပြောင်းပေးခြင်း၊ စားသောက်ဖွယ်ရာများ ပို့ဆောင်ခြင်းနှင့် အရေးပေါ်ကူညီကယ်ဆယ်ရေးလုပ်ငန်းများ ဆောင်ရွက်ပေးလျက်ရှိကြောင်း သိရသည်။
တောင်ကျရေစီးဆင်းလာမှုကြောင့် ဘုတ်ပြင်း-ကော့သောင်း ပြည်ထောင်စုလမ်းမကြီးပေါ် အရှည်ပေ ၂၀၀ ခန့် ရေကျော်နေသဖြင့် ယာဉ်များ ဘေးကင်းစွာသွားလာနိုင်ရေး လမ်းကြောင်းပြအမှတ်အသားများ ပြုလုပ်ပေးကာ ရေချောင်းအခြေအနေကို စောင့်ကြည့်၍ လိုအပ်သည့်ကယ်ဆယ်ရေးလုပ်ငန်းများ ဆက်လက်ဆောင်ရွက်နေကြောင်း သိရသည်။
