ဘရာဇီးလ်လက်ရွေးစင်အသင်းနည်းပြ အန်ဆယ်လော့တီက ပြီးခဲ့တဲ့ရက်ပိုင်းအတွင်း ယှဉ်ပြိုင်ကစားခဲ့တဲ့ ခြေစမ်းခရီးစဉ်ကို ကျေနပ်အားရကြောင်း ပြောကြားခဲ့ပါတယ်။
ဘရာဇီးလ်အသင်းဟာ အခုနိုင်ငံတကာရက်သတ္တပတ်အတွင်းမှာ သြစတြေးလျနဲ့ အိန္ဒိယကို သွားရောက်ကာ သြစတြေးလျအသင်းနဲ့ ခြေစမ်းပွဲနှစ်ပွဲ၊ အိန္ဒိယအသင်းနဲ့ ခြေစမ်းပွဲတစ်ပွဲ ယှဉ်ပြိုင်ကစားခဲ့ပါတယ်။
သြစတြေးလျအသင်းနဲ့ ပထမပွဲမှာ (၁-၁)ဂိုးနဲ့ သရေကျခဲ့ပြီး ဒုတိယပွဲမှာ (၄-၂)ဂိုးနဲ့ အနိုင်ရကာ အိန္ဒိယကိုတော့ (၄-၀)ဂိုးနဲ့ အနိုင်ရခဲ့ပါတယ်။
အန်ဆယ်လော့တီက ဒီခြေစမ်းပွဲတွေအတွက် ကစားသမား(၂၆)ဦး ရွေးချယ်ခဲ့ရာမှာ ပြီးခဲ့တဲ့ ၂၀၂၆ ကမ္ဘာ့ဖလားပြိုင်ပွဲတုန်းက ပါဝင်ခဲ့တဲ့ ကစားသမား သုံးပုံတစ်ပုံလောက်ကိုသာ ပြန်လည်ရွေးချယ်ခဲ့ကြောင်း သိရပါတယ်။
ဒါ့အပြင် အန်ဆယ်လော့တီက ကစားသမားအားလုံးကို အသုံးပြုခဲ့ပြီး လက်ရွေးစင်ကစားသမားဘဝ အစပြုခွင့်ရသူ (၈)ဦးအထိ ရှိခဲ့ကြောင်း သိရပါတယ်။
ခြေစမ်းပွဲ(၃)ပွဲစလုံးမှာ ပွဲထွက်ကစားခွင့်ရရှိခဲ့တာကတော့ တိုက်စစ်ကစားသမား ဗင်နီစီယပ်စ်နဲ့ ကွင်းလယ်ကစားသမား ဒန်နီလိုတို့ နှစ်ဦးသာ ရှိခဲ့ကြောင်းလည်း သိရပါတယ်။
''အဆုံးသတ်မှာ ကျွန်တော်တို့ ကျေနပ်အားရမိပါတယ်။ ဒီပွဲတွေရဲ့ အဆင့်အတန်းက အရေးမကြီးပါဘူး။ ကစားသမားတွေအတွက် ကောင်းကောင်းပြင်ဆင်နိုင်ဖို့နဲ့ အကောင်းဆုံးစွမ်းဆောင်ရည် ရရှိအောင် ကြိုးစားဖို့ကပဲ အရေးကြီးတာပါ။ ကစားသမားတွေရဲ့ စွမ်းဆောင်ရည်ကောင်းခဲ့တာကြောင့် အပေါင်းလက္ခဏာဆောင်ပါတယ်။ တချို့က ပိုကောင်းလာနိုင်ပါသေးတယ်'' လို့ အန်ဆယ်လော့တီက ပြောကြားခဲ့ပါတယ်။
