အမျိုးသမီးတစ်ဦးက သူသည် ခင်ပွန်း ၊ ကလေး ၅ ယောက်တို့နှင့်အတူ ကျောင်းဘတ်စ်ကားတစ်စီးပေါ်တွင် နေထိုင်လျက်ရှိကြောင်း ထုတ်ဖော်ပြောကြားသည်ဟု The Sun သတင်းဌာနက ဖော်ပြသည်။
ဂျို ပါစကိုအမည်ရှိ အမျိုးသမီးက ပြောသည်မှာ သူနှင့် မိသားစုသည် ပြီးခဲ့သော ၂ နှစ်တာအတွင်း ပေ ၄၀ ရှည်သော ကျောင်းဘတ်စ်ကားတစ်စင်းကို လူနေနိုင်ရန် ပြုပြင်ကာ သြစတေးလျနိုင်ငံတစ်ဝန်း ခရီးသွားလာ နေထိုင်ခဲ့ကြောင်း ပြောသည်။
(ဂျို ပါစကိုတို့ မိသားစု နေထိုင်သော ကျောင်းကားဟောင်း။ ဓာတ်ပုံ- tiktok@pascoes-gone-rogu)
(ကျောင်းကားအား လူနေထိုင်နိုင်ရန် ပြုပြင်ခဲ့ပုံကို ဂျို ပါစကိုက TikTok လူမှုကွန်ရက်တွင် မျှဝေခဲ့သည်။ ဓာတ်ပုံ- tiktok@pascoes-gone-rogu)
(ဂျို ပါစကိုတို့ မိသားစု နေထိုင်ကြပုံနှင့် စပ်လျဉ်းပြီး လူမှုကွန်ရက်သုံးစွဲသူတို့အကြား သဘောထားအမျိုးမျိုး ကွဲပြားနေသည်။ ဓာတ်ပုံ- tiktok@pascoes-gone-rogu)
မကြာသေးမီက ဂျို ပါစကိုသည် သူ၏ ကားအိမ်ကို ဗွီဒီယိုဖိုင်တစ်ခု ရိုက်ကူးကာ လူမှုကွန်ရက်တွင် မျှဝေခဲ့သည်။
“ဒီကားက ပြီးပြည့်စုံမှု မရှိပါဘူး။ ဒါပေမဲ့ ဒါက ကျွန်မတို့အိမ်ပါ။ ကျွန်မတို့ရဲ့ မိသားစု နေထိုင်နိုင်ဖို့ ပြုပြင်မွမ်းမံခဲ့ပါတယ်။”
“ဒီလို နေထိုင်တဲ့နည်းလမ်းက လူတိုင်းကြိုက်တဲ့ပုံစံမျိုးတော့ မဖြစ်နိုင်ပါဘူး။ ဒါပေမဲ့ လက်ရှိအချိန်မှာ ကျွန်မတို့အတွက် ပြီးပြည့်စုံပါတယ်။ ကျွန်မတို့ လိုအပ်သလို ပြောင်းလဲနိုင်ပါတယ်။”
“ကျွန်မတို့ရဲ့ကလေးတွေက ငယ်ရွယ်ကြတယ်။ ကျွန်မတို့လိုပဲ သူတို့ဟာ ခရီးသွားရတာနဲ့ ကျွန်မတို့ရဲ့လှပတဲ့ တိုင်းပြည်ကို စူးစမ်းလေ့လာရတာ သူတို့ နှစ်သက်မြတ်နိုးကြတယ်။”
“ဒါက ကျွန်မတို့ အမြဲနေမယ့်အိမ်တော့ မဟုတ်ပါဘူး။ ကျွန်မတို့ရဲ့ကလေးတွေ ဘတ်စ်ကားပေါ်က ဘဝမှာ မနေချင်တော့တဲ့အချိန်ကိုရောက်ရင် နေအိမ်တစ်လုံးဆီကို ကျွန်မတို့ ပြန်ရွှေ့ပါမယ်။”
ဂျို ပါစကိုက ပြောသည်မှာ မိမိတို့ဇနီးမောင်နှံမှာ ဆောက်လုပ်ရေးသမားများ မဟုတ်ကြောင်း ၊ ဘတ်စ်ကားကို လူနေနိုင်ရန် ပြောင်းလဲမွမ်းမံရာတွင် YouTube ဗွီဒီယိုများကို ကြည့်ရှုကာ လုပ်ဆောင်ခဲ့ခြင်းဖြစ်ကြောင်း ပြောသည်။
“ဒါက အိမ်တစ်လုံးလောက် ကုန်ကျစရိတ် မရှိပါဘူး။ ဒေါ်လာ ၁၆၀,၀၀၀ အောက်ပဲ ကုန်ကျပါတယ်။ ကားအိမ်အသစ်တစ်စီးထက်လည်း ဈေးပေါတယ်။”
ဘတ်စ်ကားကို ပြုပြင်မွမ်းမံမှုအတွက် ဒေါ်လာ ၁၀၀,၀၀၀ ကျော်ကုန်ကြောင်း ဂျို ပါစကိုက ပြောသည်။
“ဒေါ်လာ ၁၀၀,၀၀၀ ကျော် ကုန်ပါတယ်။ ကုန်ကျစရိတ် ဒေါ်လာ ၁၁၀,၀၀၀ လောက် ရောက်တဲ့အချိန်မှာ ကားကို မွမ်းမံတာတွေ ရပ်လိုက်တယ်။”
ဂျို ပါစကိုသည် TikTok တွင် @pascoes-gone-rogue ဟူသော အကောင့်ဖြင့် သူ၏ကားအိမ်အကြောင်း ဗွီဒီယိုဖိုင်တင်ခဲ့ရာ ကြည့်ရှုရသူများ များစွာ အံ့အားသင့်ခဲ့ကြသည်။
သူ၏ ဗွီဒီယိုသည် လျင်မြန်စွာ ပျံ့နှံ့သွားပြီး တစ်ရက်အတွင်း ကြည့်ရှုမှု အကြိမ်ရေ ၁ ဒသမ ၄ သန်း ရှိခဲ့သည်။
(CarsDB Team မှ ရေးသား ဖော်ပြသည်။)
Credit: CarsDB.com
