အားနက်စ်ဟဲမင်းဝေး (မွေး ၁၈၉၉- ကွယ်လွန် ၁၉၆၁) ၏ အမည်အပြည့်အစုံမှာ အားနက်စ်မေလာ ဟဲမင်းဝေး ဖြစ်ပြီး အမေရိကန်စာရေးဆရာ၊ ဝတ္ထုတိုဆရာ၊ စာနယ်ဇင်းသမားတစ်ဦး ဖြစ်သည်။
ဟဲမင်းဝေးသည် ဝတ္ထု ၇ အုပ်၊ ဝတ္ထုတိုစုစည်းမှု ၆ အုပ်၊ nonfiction ၃ အုပ်ရေးသားခဲ့သည်။
Nonfiction ၃ အုပ်မှာ မကွယ်လွန်မီ ရေးသားထားခဲ့ပြီး ကွယ်လွန်ပြီးနောက်ပိုင်းမှ ထုတ်ဝေခဲ့ခြင်း ဖြစ်သည်။
သူ၏ စာပေလက်ရာအများစုကို အမေရိကန်စာပေလောက၏ ဂန္ထဝင်လက်ရာများအဖြစ် သတ်မှတ်ထား ကြသည်။
၁၉၅၄ ခုနှစ်တွင် စာပေနိုဘယ်ဆု ရရှိခဲ့သည်။
စိတ်ကျရောဂါခံစားနေရသော ဟဲမင်းဝေးသည် ၁၉၆၁ ခုနှစ်၊ ဇူလိုင်လ ၂ ရက်တွင် မိမိကိုယ်ကို သေနတ်ဖြင့် ပစ်ကာ အဆုံးစီရင်သွားခဲ့သည်။
(မြန်မာဘာသာသို့ ပြန်ဆိုထားမှုများ)
ဟဲမင်းဝေး၏ The Old Man and The Sea ကို ဆရာမောင်ဆုရှင်က ပင်လယ်ပြာနှင့် တံငါအိုဟု မြန်မာပြန်ဆိုခဲ့ပြီး ၁၉၆၈ ခုနှစ်အတွက် အမျိုးသားစာပေဆု ရရှိခဲ့သည်။
A Movable Feast ကို ဆရာကျော်အောင်က ပါရီရုပ်ပုံလွှာ၊ A Farewell to Arms ကို ဆရာသန်းဆွေက ဝေးပေါ့...ဝေးပေါ့၊ The Sun also rise ကို ဆရာတက်တိုးက မေတ္တာမဏ္ဍိုင် ဟုလည်းကောင်း မြန်မာပြန်ဆိုထားမှုများ ရှိသည်။
ထို့အပြင် ဟဲမင်းဝေး၏ ဝတ္ထုတိုများကို ‘ကီလီမန်ဂျရိုမှာ ဝေသောနှင်းနှင့် အခြားဝတ္ထုတိုများ’ ဟူသော အမည်ဖြင့် ဆရာ ကျော်အောင်၊ ဆရာဇော်ဂျီ၊ ဆရာထင်လင်း၊ ဆရာမောင်ပေါ်ထွန်းတို့ စုပေါင်း မြန်မာပြန် ရေးသားထုတ်ဝေခဲ့ဖူးသည်။
(ဟဲမင်းဝေး နောက်ဆုံးစီးခဲ့သော ကား)
ဟဲမင်းဝေး မကွယ်လွန်မီ နောက်ဆုံးစီးခဲ့သော ကားမှာ ၁၉၅၅ ခုနှစ်ထုတ် Chrysler New Yorker ဖြစ်ပြီး အဆုံးမစီရင်မီကာလအထိ ကျူးဘားတွင် စီးနင်းခဲ့သည်။
ဟဲမင်းဝေး၏ကား ပြန်လည်ပြုပြင်ထိန်းသိမ်းရေး လုပ်ငန်းများမှာ ကျူးဘားတွင် တော်လှန်ရေးကြီး ပြီးဆုံးပြီးနောက်ပိုင်း အခြားဦးစားပေး အကြောင်းရပ်များကြောင့် ဦးစားပေးမခံခဲ့ရချေ။
သူ၏ Chrysler မှာ ကာလကြာရှည် ပျောက်ဆုံးနေခဲ့ပြီး ၂၀၁၁ ခုနှစ်တွင် ပြန်လည်တွေ့ရှိခဲ့ပြီး ထိုအချိန်၌ များစွာ ပျက်စီးနေပြီဖြစ်သည်။
ဟဲမင်းဝေး၏ Chrysler ကားကို ကျူးဘား၏ အသက်ဝိဉာဉ် ( Cuban Soul ) အမည်ဖြင့် Documentary တစ်ခု ရိုက်ကူးထားသည်။
ဟဲမင်းဝေး၏ ကားကို ပြန်လည်မွမ်းမံထိန်းသိမ်းရန် စီစဉ်ခဲ့သော ကာလများတွင် ကျူးဘားမှာ အစစအရာရာ ချို့တဲ့သော အခြေအနေတွင် ရှိသည်။
ခေတ်ဟောင်းကားများ၏ အပိုအစိတ်အပိုင်းများ ရရှိနိုင်သော အမေရိကန်ပြည်ထောင်စုမှာလည်း သမ္မတ ဂျွန်အက်ဖ်ကနေဒီလက်ထက်ကတည်းက ကျူးဘားနှင့် ကုန်သွယ်ရေးအဆက်အဆံ ဖြတ်တောက်ထားရာ ဟဲမင်းဝေး၏ ကားကို ပြန်လည်မွမ်းမံရေးမှာ မလွယ်ကူလှ။
သို့သော် ထိုအခက်အခဲကို ကျော်လွန်နိုင်မည့် အကြောင်းရပ်တစ်ခုပေါ်လာသည်။
ရုပ်ရှင်မင်းသား၊ အဆိုတော် David Soul (၁၉၇၅ ခုနှစ်တွင် အမေရိကန်၌ ထုတ်လွှင့်ပြသခဲ့သော ရုပ်သံဇာတ်လမ်းတွဲ Starsky and Hutch ဖြင့် နာမည်ကြီးခဲ့သူ) က ဟဲမင်းဝေး၏ Chrysler ကို ပြုပြင်မွမ်းမံမှု ပြုလုပ်ရန် အလွန်စိတ်ဝင်စားခဲ့သည်။
သူ၏ ပတ်စ်ပို့မှာ ဗြိတိန် ပတ်စ်ပို့ဖြစ်သောကြောင့် ကားအပိုအစိတ်အပိုင်းများ သယ်ယူရန် လွယ်ကူစေခဲ့သည်။
((ဟဲမင်းဝေး၏ ရိုးရွိုက်စ်))
ဟဲမင်းဝေး၏ ကားများအကြောင်းကို သူရေးသားခဲ့သော စာပေများ ဖတ်ရှုခြင်းဖြင့် မသိနိုင်ချေ။
ဟဲမင်းဝေးသည် ၁၉၂၉ ခုနှစ်ထုတ် Rolls-Royce Phantom II တစ်စီးလည်း ပိုင်ဆိုင်ခဲ့ဖူးသည်။
A Farewell to Arms စာအုပ် ထုတ်ဝေသောနှစ်တွင် ဟဲမင်းဝေးက Rolls-Royce ကို ဝယ်ယူခဲ့ခြင်းဖြစ်ပြီး သူ၏ အမဲလိုက်ပစ္စည်းများ သယ်ဆောင်နိုင်ရန် မွမ်းမံပြင်ဆင်မှုများ ပြုလုပ်ခဲ့သည်။
(ရုပ်ရှင်မင်းသား David Soul ကို ဟဲမင်းဝေး နောက်ဆုံးစီးခဲ့သောကား Chrysler New Yorker နှင့်အတူ တွေ့ရပုံ။ ဓာတ်ပုံ Cuban Soul)
((ဇနီးအတွက် ဝယ်ပေးခဲ့သောကား))
ဟဲမင်းဝေးသည် စတုတ္တမြောက် ဇနီး မေရီအတွက် Plymouth ကားတစ်စီး ဝယ်ပေးခဲ့ဖူးသည်။
((မွမ်းမံထိန်းသိမ်းမှု))
ဟဲမင်းဝေးသည် ကျူးဘားတွင် ဖီဒယ် ကက်စ်ထရို အာဏာရလာချိန်၌ သူ၏ကားများနှင့် Pilar ဟုအမည်ပေးထားသော သူ၏လှေတို့ကို စွန့်လွှတ်ခဲ့ရသည်။
ဟဲမင်းဝေး၏ ဇနီး မေရီက ဟဲမင်းဝေးစီးခဲ့သောကားကို မိသားစုဆရာဝန်အားပေးခဲ့ပြီး ယင်းနောက်ပိုင်း လက်လွှဲလက်ပြောင်းများစွာဖြစ်ခဲ့သည်။
သို့သော် ဟဲမင်းဝေးပြတိုက်မှ အေဒါရို့စ်က နောက်ဆုံးတွင် ဟဲမင်းဝေး၏ ကားကို ခြေရာခံနိုင်ခဲ့ပြီး ရုပ်ရှင်မင်းသား David Soul ၏ အကူအညီဖြင့် ပြန်လည်ပြုပြင်မွမ်းမံမှုများ ပြုလုပ်ခဲ့ကာ David Soul က ထိုကားအကြောင်း documentary တစ်ခု ရိုက်ကူးခဲ့ကာ Cuban Soul ဟု အမည်ပေးခဲ့သည်။
(ဟဲမင်းဝေးနောက်ဆုံးစီးခဲ့သောကားကို ပြုပြင်မွမ်းမံမှုများ ပြုလုပ်ခဲ့ပုံ။ ဓာတ်ပုံ-Cuban Soul)
[ရုပ်ရှင်မင်းသား David Soul (ထိုင်နေသူ) ကို ကျူးဘားရှိ အားနက်စ် ဟဲမင်းဝေးပြတိုက်အတွင်း တွေ့ရပုံ။ ဓာတ်ပုံ-Chris Paquin]
(CarsDB Team မှ ရေးသား ဖော်ပြသည်။)
Credit: CarsDB.com
Ref: Actor David Soul (Starsky & Hutch) Restores Hemingway's Chrysler--in Cuba (cartalk)
