သက်တံ့
၆. ၁၁. ၂၀၂၆
တရုတ်နိုင်ငံခြားရေးဝန်ကြီး ဝမ်ယိက အွန်လိုင်းလိမ်လည်မှု လုပ်ငန်းများကို ပြန်လည်ခေါင်းထောင်မလာစေရန်အတွက် လက်ရှိလုပ်ဆောင်နေသော ပြင်းထန်သည့် နှိမ်နင်းမှုများကို တရုတ်နှင့် ကမ္ဘောဒီးယားနှစ်နိုင်ငံစလုံးက ဆက်လက်ထိန်းသိမ်း လုပ်ဆောင်သွားရန် တိုက်တွန်းပြောကြားလိုက်သည်။
တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကော်ကျားခွန်း၏ ပြောကြားချက်အရ ဝမ်ယိသည် နိုဝင်ဘာ ၄ ရက်နေ့က ပေကျင်းမြို့တွင် ကမ္ဘောဒီးယား နိုင်ငံခြားရေးနှင့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး ပရက်ဆိုခွန် (Prak Sokhonn) နှင့် တွေ့ဆုံခဲ့ခြင်း ဖြစ်သည်။
ထိုသို့တွေ့ဆုံရာတွင် အခြေခံအဆောက်အအုံ၊ စိုက်ပျိုးရေးနှင့် စက်မှုဖွံ့ဖြိုးတိုးတက်ရေး ကဏ္ဍများတွင် ပူးပေါင်းဆောင်ရွက်မှုကို ပိုမိုနက်ရှိုင်းစေရန် အဆိုပြုချက်များကိုလည်း ဝမ်ယိက မျှဝေခဲ့သည်။
ပရက်ဆိုခွန်သည် (၁၁) ကြိမ်မြောက် လန်ချန်း-မဲခေါင် ပူးပေါင်းဆောင်ရွက်မှု (LMC) နိုင်ငံခြားရေးဝန်ကြီးများ အစည်းအဝေးသို့ တက်ရောက်ရန် တရုတ်မြို့တော် ပေကျင်းသို့ ရောက်ရှိနေခြင်း ဖြစ်သည်။
”နှစ်နိုင်ငံစလုံးအနေနဲ့ တယ်လီကွန်းနဲ့ အွန်လိုင်းလိမ်လည်မှုတွေကို ပြင်းပြင်းထန်ထန် ဆက်လက်နှိမ်နင်းသွားရမှာဖြစ်ပြီး ဒီလိုပြစ်မှုမျိုးတွေ ဘယ်တော့မှ ပြန်လည် မပေါ်ပေါက်လာစေဖို့ သေချာအောင် လုပ်ဆောင်ရပါမယ်” ဟု ဝမ်ယိက ပြောကြားခဲ့သည်။
ဝမ်ယိ၏ ပြောကြားချက်များသည် လိမ်လည်မှုဆန့်ကျင်ရေး ပူးပေါင်းဆောင်ရွက်မှုကို ခိုင်မာသော မဟာဗျူဟာမြောက် ဆက်သွယ်ရေးနှင့် စီးပွားရေးစင်္ကြံနှစ်ခု ဖွံ့ဖြိုးတိုးတက်ရေးတို့နှင့်အတူ နှစ်နိုင်ငံဆက်ဆံရေးအတွက် အဓိကဦးစားပေး လုပ်ငန်းများထဲမှ တစ်ခုအဖြစ် သတ်မှတ်ပေးခဲ့သည်။
ထို့အတူ အခြေခံအဆောက်အအုံ၊ စိုက်ပျိုးရေးနှင့် အခြားကဏ္ဍများတွင် လက်တွေ့ကျသော ပူးပေါင်းဆောင်ရွက်မှုများကို နက်ရှိုင်းစွာ လုပ်ဆောင်ရင်း နှစ်နိုင်ငံအနေဖြင့် “စက်မှုဖွံ့ဖြိုးတိုးတက်ရေး စင်္ကြံ” နှင့် စိုက်ပျိုးမွေးမြူရေးဆိုင်ရာ “ငါးနှင့်ဆန် စင်္ကြံ” တို့ကို မြှင့်တင်သင့်ကြောင်း ဝမ်ယိက ပြောကြားခဲ့သည်။
ထို့ပြင် ၎င်းတို့၏ ဘုံမဟာဗျူဟာမြောက် အကျိုးစီးပွားများကို ကာကွယ်စောင့်ရှောက်ရန်အတွက် နောက်ထပ်အဆင့်မြင့် တွေ့ဆုံဆွေးနွေးမှုများအတွက် ပြင်ဆင်ရန်နှင့် ပိုမိုနီးကပ်စွာ ဆက်သွယ်သွားရန်လည်း ၎င်းက တိုက်တွန်းခဲ့သည်။
ဤစီးပွားရေးဆိုင်ရာ အဆိုပြုချက်များနှင့်အတူ ကမ္ဘောဒီးယား၏ ဖွံ့ဖြိုးတိုးတက်မှု လမ်းကြောင်းရွေးချယ်မှုများနှင့် ပြင်ပစိန်ခေါ်မှုများကို ဖြေရှင်းရန် ကြိုးပမ်းမှုများ၌ တရုတ်နိုင်ငံက ဆက်လက်ကူညီသွားမည်ဟု အာမခံချက်ပေးခဲ့သည်။
ထို့အပြင် တရုတ်နိုင်ငံသည် ကမ္ဘောဒီးယားအတွက် “ယုံကြည်စိတ်ချရသည့် မဟာဗျူဟာမြောက် မဏ္ဍိုင်” ဖြစ်သည်ဟု ဖော်ပြပြောဆိုကာ ပေကျင်းအနေဖြင့် ကမ္ဘောဒီးယား၏ အမျိုးသားအခြေအနေများနှင့် ကိုက်ညီသော ဖွံ့ဖြိုးတိုးတက်မှုလမ်းကြောင်းအတိုင်း လျှောက်လှမ်းမှုကို ခိုင်မာစွာ ဆက်လက်ထောက်ခံသွားမည်ဟု ဝမ်ယိက ပြောကြားခဲ့သည်။
တရုတ်နိုင်ငံအနေဖြင့် ကမ္ဘောဒီးယားနှင့် မဟာဗျူဟာမြောက် ဆက်သွယ်ရေးကို မြှင့်တင်ရန်၊ ပြင်ပစိန်ခေါ်မှုများကို ပူးတွဲတုံ့ပြန်ရန်နှင့် နှစ်နိုင်ငံလုံး၏ ခေတ်မီဆန်းသစ်ရေး ကြိုးပမ်းမှုများကို ထောက်ခံအားပေးရန် ပြင်ဆင်ထားကြောင်းလည်း ၎င်းက ဆိုသည်။
ဒေသတွင်း ပူးပေါင်းဆောင်ရွက်မှုနှင့် ပတ်သက်၍ လန်ချန်း-မဲခေါင် ပူးပေါင်းဆောင်ရွက်မှု (LMC) ယန္တရားသည် ခိုင်မာသော အုတ်မြစ်နှင့် အလားအလာကောင်းများ ရှိနေပြီး ကမ္ဘောဒီးယား၏ ဖွံ့ဖြိုးတိုးတက်မှု၊ ပြန်လည်ဆန်းသစ်လာမှုနှင့် ပြည်သူများ၏ လူမှုစီးပွားဘဝ တိုးတက်မြင့်မားရေးတို့အတွက် အထောက်အကူပြုနိုင်မည်ဖြစ်ကြောင်းလည်း ဝမ်ယိက မှတ်ချက်ပြုပြောကြားခဲ့သည်။
Ref: Phnom Penh Post
